Meta, Apple, Google va OpenAI: 6 oy ichida xorijiy texno-gigantlar Oʻzbekistonda qancha soliq toʻladi?

2025 yilning yanvar–iyun oylarida Oʻzbekistonda elektron xizmatlar koʻrsatuvchi 72 ta xorijiy kompaniya tomonidan jami 78,2 milliard soʻm (MB Obligatsiyalar boʻyicha $6,1 million) soliq toʻladi. Bu haqda Soliq qoʻmitasi xabar berdi.  

Mazkur koʻrsatkich oʻtgan yilning shu davriga nisbatan 42 foizga oshgan. Toʻlangan soliqlarning 94 foizi 10 ta yirik kompaniya hissasiga toʻgʻri kelgan. 

Shuningdek, ushbu davrda mazkur kompaniyalar tomonidan koʻrsatilgan jami xizmatlar hajmi 656,8 mlrd soʻmni tashkil qilgan. Bu oʻtgan yilning shu davriga nisbatan 43 foizga koʻproqdir.

Xorijiy kompaniyalar orasida Meta 22,6 mlrd soʻmlik soliq toʻlovlari bilan yetakchi boʻldi. Meta’ning Oʻzbekistonda koʻrsatgan xizmatlar hajmi 187,6 mlrd soʻmni tashkil qilgan.

Undan keyingi oʻrinni esa 184 mlrd soʻmlik xizmatlar hajmi va 22,1 mlrd soʻmlik soliq toʻlovi bilan Apple egalladi.

19,4 mlrd soʻm soliq toʻlagan Google kuchli uchlikni yakunlab bergan.

Eʼtiborli jihati, 2025 yil aprel oyida soliq toʻlovchi sifatida roʻyxatdan oʻtgan OpenAI chorak yakuniga kelib, toʻrtinchi eng koʻp soliq toʻlovchi xorijiy elektron kompaniyaga aylandi. ChatGPT ishlab chiquvchisi Oʻzbekistonda 23,9 mlrd soʻmlik xizmatlar koʻrsatib, 2,9 mlrd soʻm soliq toʻlagan.

Faoliyati Oʻzbekistonda bloklangan boʻlishiga qaramay, TikTok ham 1,8 mlrd soʻm soliq toʻlagan.

Shuningdek, Netflix — 896 mln soʻm, ACCA — 797 mln soʻm, Zoom — 786,7 mln soʻm va Adobe — 530,8 mln soʻm soliq toʻlagan.