Markaziy bank Oʻzbekistonning ilk mundial yoʻllanmasiga bagʻishlangan oltin va kumush tangalarni sotuvga chiqaradi
Oʻzbekiston milliy terma jamoasining tarixda ilk bor futbol boʻyicha Jahon chempionatiga chiqishi munosabati bilan 100 dona oltin va 1 000 dona kumush esdalik tangasi zarb etildi. Ular 18 iyundan boshlab tijorat banklarining 690 ta filialida sotiladi.
Markaziy bank futbol boʻyicha Oʻzbekiston milliy terma jamoasining “Jahon chempionati — 2026”dagi ishtirokiga bagʻishlangan maxsus esdalik tangalarini muomalaga chiqaradi.
Tangalar terma jamoaning tarixda ilk bor mundial yoʻllanmasini qoʻlga kiritganini abadiylashtirish maqsadida 999,9 asllikdagi sof oltin va kumushdan zarb etilgan.
Esdalik tangalarining old tomonida Oʻzbekiston futbol assotsiatsiyasi logotipi, klassik futbol toʻpi tasviri hamda “Tarixiy zafar. Oʻzbekiston futboli jahon chempionatida — 2026” yozuvi joylashtirilgan. Kompozitsiya mamlakat futboli tarixida yangi davr boshlanganini ifodalaydi.
Tanganing orqa tomonida esa muxlislar orasida “Oq boʻrilar” nomi bilan tanilgan milliy terma jamoa ramzi — boʻri silueti aks ettirilgan. Mazkur tasvir futbolchilarning shijoati, jamoaviy ruhi va taslim boʻlmas xarakterini anglatadi.
Boʻri shakli 26 nafar futbolchining siluetidan tuzilgan. Bu tarixiy natijaga alohida bir futbolchi emas, balki butun jamoaning birdamligi va umumiy mehnati orqali erishilganini ramziy tarzda koʻrsatadi.
Dizaynda milliy terma jamoa liboslaridagi, qadimiy obidalar devorlaridan ilhomlangan naqshlardan ham foydalanilgan. Shu tariqa futbol, milliy gʻurur, tarix va madaniyat unsurlari yagona kompozitsiyada birlashtirilgan.
Har bir tanganing ogʻirligi 31,1 grammni tashkil etadi. Jami 100 dona oltin va 1 000 dona kumush tanga ishlab chiqarilgan. Cheklangan tiraj ularning badiiy va kolleksion qiymatini oshiradi.
Esdalik tangalari 18 iyundan boshlab tijorat banklarining 690 ta filialida sotuvga chiqariladi. Narxlar va banklardagi mavjud tangalar haqidagi yangilangan maʼlumotlar Markaziy bankning rasmiy sayti hamda ijtimoiy tarmoqlardagi sahifalarida har kuni eʼlon qilib boriladi.
