Марказий банк Ўзбекистоннинг илк мундиал йўлланмасига бағишланган олтин ва кумуш тангаларни сотувга чиқаради
Ўзбекистон миллий терма жамоасининг тарихда илк бор футбол бўйича Жаҳон чемпионатига чиқиши муносабати билан 100 дона олтин ва 1 000 дона кумуш эсдалик тангаси зарб этилди. Улар 18 июндан бошлаб тижорат банкларининг 690 та филиалида сотилади.
Марказий банк футбол бўйича Ўзбекистон миллий терма жамоасининг “Жаҳон чемпионати — 2026”даги иштирокига бағишланган махсус эсдалик тангаларини муомалага чиқаради.
Тангалар терма жамоанинг тарихда илк бор мундиал йўлланмасини қўлга киритганини абадийлаштириш мақсадида 999,9 аслликдаги соф олтин ва кумушдан зарб этилган.
Эсдалик тангаларининг олд томонида Ўзбекистон футбол ассоциацияси логотипи, классик футбол тўпи тасвири ҳамда “Тарихий зафар. Ўзбекистон футболи жаҳон чемпионатида — 2026” ёзуви жойлаштирилган. Композиция мамлакат футболи тарихида янги давр бошланганини ифодалайди.
Танганинг орқа томонида эса мухлислар орасида “Оқ бўрилар” номи билан танилган миллий терма жамоа рамзи — бўри силуэти акс эттирилган. Мазкур тасвир футболчиларнинг шижоати, жамоавий руҳи ва таслим бўлмас характерини англатади.
Бўри шакли 26 нафар футболчининг силуэтидан тузилган. Бу тарихий натижага алоҳида бир футболчи эмас, балки бутун жамоанинг бирдамлиги ва умумий меҳнати орқали эришилганини рамзий тарзда кўрсатади.
Дизайнда миллий терма жамоа либосларидаги, қадимий обидалар деворларидан илҳомланган нақшлардан ҳам фойдаланилган. Шу тариқа футбол, миллий ғурур, тарих ва маданият унсурлари ягона композицияда бирлаштирилган.
Ҳар бир танганинг оғирлиги 31,1 граммни ташкил этади. Жами 100 дона олтин ва 1 000 дона кумуш танга ишлаб чиқарилган. Чекланган тираж уларнинг бадиий ва коллексион қийматини оширади.
Эсдалик тангалари 18 июндан бошлаб тижорат банкларининг 690 та филиалида сотувга чиқарилади. Нархлар ва банклардаги мавжуд тангалар ҳақидаги янгиланган маълумотлар Марказий банкнинг расмий сайти ҳамда ижтимоий тармоқлардаги саҳифаларида ҳар куни эълон қилиб борилади.
