Markaziy bank 2 ta bank va 2 ta mikromoliya tashkilotiga jarima qoʻlladi
Bank nazorati qoʻmitasi aprel oyida 30 ta masalani koʻrib chiqdi. Qonunchilik talablari buzilgani va inspeksiya davomida aniqlangan kamchiliklar sabab 2 ta bank hamda 2 ta mikromoliya tashkilotiga jarima qoʻllanildi.
Markaziy bankning Bank nazorati qoʻmitasi 2026 yil aprel oyida jami 6 marotaba yigʻilish oʻtkazib, 30 ta masalani koʻrib chiqdi. Bu haqda regulyator matbuot xizmati xabar berdi.
Qayd etilishicha, koʻrib chiqilgan masalalarning 21 tasi roʻyxatga olish va ruxsat berish yoʻnalishiga tegishli boʻlgan. Ular orasida kredit tashkilotlari ustaviga kiritilgan oʻzgartirishlarni roʻyxatdan oʻtkazish, ustav fondidagi ulushga egalik qilish uchun ruxsat berish hamda banklarda audit oʻtkazish huquqini beruvchi auditorlik malaka sertifikatini taqdim etish bilan bogʻliq masalalar bor.
Shuningdek, tijorat banklari kuzatuv kengashi va boshqaruvi aʼzolari, shuningdek, muhim ahamiyatga ega xodimlar lavozimiga tavsiya etilgan nomzodlar ham muhokama qilingan.
Bundan tashqari, kredit tashkilotlarining moliyaviy holatiga oid 9 ta masala koʻrib chiqilgan. Xususan, Markaziy bank koʻrsatmalari va prudensial meʼyorlar talablarining bajarilishi, bank va nobank kredit tashkilotlarida oʻtkazilgan inspeksiya hamda oʻrganishlar natijalari muhokama qilingan.
Qonunchilik talablariga muvofiq faoliyat tashkil etilmagani, shuningdek, inspeksiya va oʻrganishlar davomida aniqlangan kamchiliklar sababli 2 ta bank hamda 2 ta mikromoliya tashkilotiga nisbatan jarima sanksiyalari qoʻllanilgan.
