Kumush narxlari 2025 yilda 100 foizdan koʻproq oshdi, oltin esa yana rekordga yaqinlashmoqda
Chorshanba kuni jahon bozorlarida oltin narxi 0,8 foizga oshib, bir unsiyasi 4 334,68 dollarni tashkil etdi. Kumush esa 3,6 foizga koʻtarilib, 66,3 dollar bilan tarixiy rekordni qayd etdi. Narxlar oʻsishi AQSh iqtisodiyoti atrofidagi noaniqliklar fonida xavfsiz aktivlarga talab oshishi bilan bogʻliq.
Jahon bozorida chorshanba kungi savdolarda oltin narxlari oshdi, kumush esa rekord darajaga koʻtarildi. Bunga AQSh iqtisodiyoti atrofidagi noaniqlik kuchayib, investorlarning xavfsiz aktivlarga boʻlgan talabini oshirgani sabab boʻldi.
Spot oltin 0,8 foizga oshib, bir unsiyasi 4 334,68 dollarni tashkil etdi. Fevral oyi uchun oltin fyucherslari ham 0,8 foizga koʻtarilib, 4 365,30 dollarga yetdi. Spot oltin hozirda yangi rekord darajani qayd etishdan taxminan 50 dollar past turibdi.
Ayni paytda Oʻzbekistonda oltin quymalari narxi quyidagicha boʻlib turibdi:
Spot kumush narxi 3,6 foizga oshib, bir unsiyasi uchun 66,3 dollarga yetdi — bu tarixiy rekord. Kumush fyucherslari esa 4,5 foizga koʻtarilib, 66,4 dollarni tashkil etdi.
Bozorlar 2026 yilda kumush yetkazib berishda taqchillik yuzaga kelishi mumkinligini inobatga olib, pozitsiyalarini moslashtirmoqda. Bunga oq metallga boʻlgan talabning oshib borayotgani sabab boʻlmoqda. Joriy yil boshida AQSh hukumati kumushni muhim (strategik) metall sifatida belgiladi, bu esa uning jozibadorligini yanada kuchaytirdi.
Xavfsiz aktiv izlayotgan treyderlar joriy yilda kumushni faol sotib oldi. Negaki kumush oltinga yaqin darajadagi barqarorlikni taklif etadi, biroq kirish narxi ancha past. Natijada, 2025 yil boshidan buyon kumush narxi 100 foizdan ortiq oshdi. Bu davrda na oltin va na platina bunday oʻsishni koʻrsatmagan.
ANZ tahlilchilari yaqinda eʼlon qilgan izohida oltin va kumush narxlari 2026 yilda ham oʻsishni davom ettirishi mumkinligini, chunki AQSh iqtisodiyoti boʻyicha noaniqliklar yaqin kelajakda pasayish alomatlarini koʻrsatmayotganini taʼkidladi.
