Kredit tarixini tekshirganlarning atigi 5 foizi aʼlo darajadagi skoringga ega
2025 yilning birinchi yarmida qariyb 1 million fuqaro oʻz kredit tarixini tekshirtirdi. Kredit Axboroti Tahliliy Markazi maʼlumotlariga koʻra, ularning 69 foizi erkaklar, 31 foizi esa ayollarni tashkil etadi. Skoring ballari tahliliga koʻra, murojaat qilganlarning atigi 5 foizi aʼlo darajadagi skoringga ega boʻlgan, 28 foizi yaxshi, 55 foizi esa oʻrtacha koʻrsatkich bilan cheklangan.
Kredit Axboroti Tahliliy Markazi (KATM) maʼlumotlariga koʻra, 2025 yilning birinchi yarmida kredit hisobotlaridan foydalanganlar soni 957 402 nafarni tashkil etdi. Bu koʻrsatkich 2024 yilning shu davriga (400 950) nisbatan qariyb 2,4 barobarga yuqori.
Hisobotdan asosan jismoniy shaxslar foydalangan, ular orasida eng faol toifa 26–35 yoshdagilar – 41% (388 456 kishi)ni tashkil etdi. Keyingi oʻrinlarda 36–45 yoshdagilar – 23% (222 247 kishi), 16–25 yoshdagilar – 22% (205 009 kishi), 46–55 yoshdagilar – 9% (88 093 kishi) hamda 56 yosh va undan kattalar – 5% (44 940 kishi) qayd etildi. Bu raqamlar kredit bozorida asosan yoshlar faol ekanini koʻrsatadi.
Jismoniy shaxslarning aksariyati kredit tarixini olishga bir marta murojaat qilgan boʻlib, ularning ulushi 63 foizni tashkil etadi. Ikki marta murojaat qilganlar 23 foiz, uch marta foydalanganlar 6 foiz, toʻrt marta foydalanganlar 2 foiz, besh va undan koʻp marta foydalanganlar esa yana 6 foizni tashkil qilgan. Murojaat qilganlarning 69 foizi erkaklar, 31 foizi ayollardan iborat.
Skoring ballari boʻyicha tahlil shuni koʻrsatdiki, fuqarolarning atigi 5 foizi aʼlo kredit tarixiga ega. Qolgan 28 foiz “yaxshi” koʻrsatkichga ega boʻlsa, 55 foiz “oʻrtacha” darajada baholangan. Qariyb 1 foiz fuqaroning kredit tarixi esa “yomon” sifatida qayd etilgan.
Hududlar kesimida eng koʻp murojaat Toshkent shahrida qayd etilgan — 19,4 foiz, undan keyingi oʻrinlarda Toshkent viloyati (11,9 foiz) va Samarqand viloyati (8,3 foiz) joylashgan.
