Kelajakda pul yoʻqoladi, uning oʻrnini energiya birliklari egallaydi — Ilon Mask

Amerikalik milliarder Ilon Mask kelajakda pul yoʻqolib ketishi mumkinligini aytdi. Tadbirkorning soʻzlariga koʻra, ularning ekvivalenti sifatida energiya birliklari xizmat qiladi. Bu haqda u Tesla kompaniyasi aksiyadorlari yigʻilishida bayonot berdi.

Shu bilan birga, milliarder hazil aralash tarzda Tesla aksiyadorlariga kompaniya aksiyalarini saqlab qolishni maslahat berdi.

Avvalroq Tesla investorlari Ilon Maskni boshqaruvdagi muvaffaqiyati uchun deyarli bir trillion dollarlik mukofot bilan taqdirlashni maʼqullashgan edi. Bunday qarorni kompaniyaning yillik aksiyadorlar yigʻilishida ovoz berganlarning 75 foizidan ortigʻi qoʻllab-quvvatlagan.

Mask ushbu toʻliq summani olish uchun kompaniya kapitallashuvini 1,5 trillion dollardan 8,5 trillion dollargacha oshirishi kerak boʻladi. Shuningdek, shartlar qatorida avtonom transport vositalari va insonsimon robotlarni joriy etish ham bor. Bundan tashqari, kompaniya foydasi yuzlab milliard dollar darajasiga yetishi lozim. Mukofot toʻlovlari bosqichma-bosqich amalga oshiriladi va ular erishilgan natijalarga bogʻliq boʻladi.