Келажакда пул йўқолади, унинг ўрнини энергия бирликлари эгаллайди — Илон Маск

Америкалик миллиардер Илон Маск келажакда пул йўқолиб кетиши мумкинлигини айтди. Тадбиркорнинг сўзларига кўра, уларнинг эквиваленти сифатида энергия бирликлари хизмат қилади. Бу ҳақда у Tesla компанияси акциядорлари йиғилишида баёнот берди.

Шу билан бирга, миллиардер ҳазил аралаш тарзда Tesla акциядорларига компания акцияларини сақлаб қолишни маслаҳат берди.

Аввалроқ Tesla инвесторлари Илон Маскни бошқарувдаги муваффақияти учун деярли бир триллион долларлик мукофот билан тақдирлашни маъқуллашган эди. Бундай қарорни компаниянинг йиллик акциядорлар йиғилишида овоз берганларнинг 75 фоизидан ортиғи қўллаб-қувватлаган.

Маск ушбу тўлиқ суммани олиш учун компания капиталлашувини 1,5 триллион доллардан 8,5 триллион долларгача ошириши керак бўлади. Шунингдек, шартлар қаторида автоном транспорт воситалари ва инсонсимон роботларни жорий этиш ҳам бор. Бундан ташқари, компания фойдаси юзлаб миллиард доллар даражасига етиши лозим. Мукофот тўловлари босқичма-босқич амалга оширилади ва улар эришилган натижаларга боғлиқ бўлади.