Kam taʼminlangan oilalarga 184 mlrd soʻmga yaqin QQS qaytarildi
Oʻzbekistonda 2025 yil davomida kam taʼminlangan oilalarni ijtimoiy qoʻllab-quvvatlash maqsadida 184 milliard soʻmga yaqin QQS mablagʻlari qaytarildi. Davlat soliq xizmati maʼlumotlariga koʻra, yil davomida 375 mingdan ortiq fuqaro xarid cheklari orqali ijtimoiy keshbek olish imkoniyatidan foydalangan.
2025 yil yanvar–dekabr oylarida kam taʼminlangan aholini qoʻllab-quvvatlash maqsadida xarid cheklari orqali toʻlangan ijtimoiy keshbek (QQS) hajmi 184 mlrd soʻmga yaqinni tashkil etdi. Bu haqda Davlat soliq xizmati maʼlumotlarida keltirilgan (2026 yil 4 fevral holatiga).
Yil davomida mazkur mexanizm orqali 375,6 ming nafar isteʼmolchiga mablagʻlar qaytarilgan. Shu davr mobaynida 7,69 mln dona chek asosida ijtimoiy keshbek hisoblangan.
Maʼlumotlarga koʻra, 2025 yil dekabr oyining oʻzida:
- 217,3 ming nafar foydalanuvchiga
- 1,1 mln dona chek boʻyicha
- 40,8 mlrd soʻm ijtimoiy keshbek toʻlab berilgan.
Hududlar kesimida eng yuqori koʻrsatkichlar
Ijtimoiy keshbek summasi eng koʻp toʻlangan hududlar quyidagilar boʻldi:
- Samarqand viloyati — 42 mlrd soʻm
- Toshkent shahri — 31,6 mlrd soʻm
- Andijon viloyati — 25,5 mlrd soʻm
Shuningdek, Toshkent viloyati (18,3 mlrd soʻm), Fargʻona (14,6 mlrd soʻm) va Namangan (10,7 mlrd soʻm) viloyatlarida ham yuqori faollik kuzatilgan.
