iPhone narxlari soʻnggi yillar ichida ilk marotaba oshishi kutilmoqda
AQSh–Xitoy oʻrtasidagi bojxona tariflari, komponentlar narxining koʻtarilishi va inflyatsiya tufayli “Air”, “Pro” hamda “Pro Max” modellari uchun 50 dollargacha qoʻshimcha narx qoʻshilishi prognoz qilinmoqda. Oddiy iPhone 17 esa $799 narxda qolishi mumkin.
Apple 2025 yil sentabr oyida taqdim etilishi kutilayotgan iPhone 17 seriyasi bilan birga narx siyosatida ham oʻzgarishlar qilishi mumkin. Bu haqida Pinkod avvalroq yozgan edi.
Soʻnggi yillarda barqaror saqlanib kelgan narxlar bu safar oshishi ehtimoli katta. Xususan, yangi “Air”, “Pro” va “Pro Max” modellari uchun 50 dollargacha koʻtarilish prognoz qilinmoqda, oddiy iPhone 17 esa $799 boshlangʻich narxida qolishi mumkin.
Narx oshishining asosiy sabablari
Mutaxassislar narxlarning oshishiga bir nechta omillar sabab boʻlishini taʼkidlashmoqda:
Bojxona bojlari — AQShning Xitoyda ishlab chiqarilgan iPhoneʼlar uchun joriy etgan tariflari ishlab chiqarish xarajatlarini sezilarli oshirdi.
Xomashyo va komponentlar narxining koʻtarilishi — global bozorlardagi inflyatsiya va yetkazib berish zanjiridagi qiyinchiliklar bunga taʼsir qilmoqda.
Geosiyosiy omillar — savdo-sotiqdagi tarangliklar ishlab chiqarish va logistika xarajatlarini yanada oshirmoqda.
Texnologiya manbalariga koʻra, AQSh bozorida iPhone 17ʼlarning taxminiy narxlari quyidagicha boʻlishi mumkin:
iPhone 17 Air — $949
iPhone 17 Pro — $1,049
iPhone 17 Pro Max — $1,249
Narx oshishidan kelib chiqadigan salbiy fikrlarni yumshatish uchun Apple Pro modellarning boshlangʻich xotirasini 256 GBʼgacha oshirishi mumkin. Bu foydalanuvchilarga qoʻshimch qiymat berishi kutilmoqda.
Yangi iPhone 17 seriyasi 2025 yil sentabr boshida, taxminan 9–10-sentabr kunlari taqdim etilishi kutilmoqda. Shundan soʻng, oldindan buyurtmalar ochiladi va qoʻshimcha tafsilotlar eʼlon qilinadi.
