Instagram 10 yil ichida ilk bor yozuvli logotipini oʻzgartirdi

Instagram oʻz nomi aks etgan yozuvli logotip — vordmarkni soʻnggi oʻn yilda ilk bor yangiladi. Ilovaning rangli kamera ikonkasiga tegilmadi, oʻzgarish asosan Instagram tepasida koʻrinadigan yozuv va brendning umumiy vizual tizimini qamrab oldi.

Instagram rahbari Adam Mosseri yangi dizaynni “yanada toza va zamonaviy” deb taʼrifladi. Uning aytishicha, avvalgi yozuv oʻn yil davomida oʻzgarmagani uchun uni yangilash vaqti kelgan.

Yangi vordmark qoʻlyozma va bosma shrift elementlarini birlashtiradi. Dizaynerlar yuzlab variantlarni, jumladan, bosh harflar, kamera shakliga asoslangan yechimlar va toʻliq qoʻlda yozilgan uslublarni sinab koʻrgan. Yakunda Instagram’ga xos kalligrafik koʻrinish saqlab qolingan.

Instagram mahsulot dizayni direktori Jasmin Probstga koʻra, kursiv yozuv individual uslub va shaxsiy ovozni ifodalaydi. Shu sababli yangi logotip avvalgisiga qaraganda sodda va qalinroq ishlangan boʻlsa-da, qoʻlyozmaga oʻxshash shakl saqlangan.

Oʻzgarish faqat logotip bilan cheklanmaydi. Meta Instagram Sans shriftini yangilab, qoʻlyozma koʻrinishidagi Instagram Pen va monoshirinali Instagram Mono shriftlarini ham yaratdi. Platformaning mashhur rangli gradiyenti saqlab qolinadi, biroq undan endi nisbatan kamroq va moslashuvchan shaklda foydalaniladi. Instagram’ning yangilangan brend tizimi global miqyosda bosqichma-bosqich joriy qilinadi.

Ayni paytda yangi yozuv foydalanuvchilar orasida turlicha kutib olindi. Ayrimlar undagi harflar birikmasi “Instagram” emas, “Instagzam” deb oʻqilayotgandek koʻrinishini taʼkidladi. The Verge ham yangi vordmark avvalgisiga qaraganda oʻqilishi qiyinroq ekaniga eʼtibor qaratgan.

Instagram’ning hozirgi rangli kamera ikonkasiga asoslangan dizayni 2016 yilda taqdim etilgan.