InFInBank boshqaruvida oʻzgarishlar roʻy berdi
11 sentabr kuni boʻlib oʻtgan Kuzatuv kengashi yigʻilishi qaroriga muvofiq, Bobur Burxanov kengash raisi etib saylandi, shuningdek, boshqaruvda yangi tayinlovlar amalga oshirildi.
InFInBank aksiyadorlik jamiyati rahbariyati tarkibida muhim oʻzgarishlar amalga oshirildi. Bu haqda Korporativ maʼlumotlar yagona portalida maʼlum qilindi.
11 sentabr kuni bank Kuzatuv kengashining navbatdagi yigʻilishi boʻlib oʻtdi. Unda tashkilot boshqaruvida bir qator kadrlar masalasi koʻrib chiqildi.
Yigʻilish yakunida kengash aʼzolari bir ovozdan Bobur Nodirxonovich Burxanovni InFInBank AJ Kuzatuv kengashi raisi etib saylash toʻgʻrisida qaror qabul qildi.
Bobur Burxanov bank tizimida katta tajribaga ega mutaxassis boʻlib, 2018 yil mayidan 2023 yil dekabrigacha InFInBank AJ boshqaruvi raisi lavozimida faoliyat yuritgan.
Kuzatuv kengashi qaroriga muvofiq, bank boshqaruvida ham oʻzgarishlar boʻldi. Jumladan, Baxtiyorjon Joʻrayev InFInBank boshqaruv raisining birinchi oʻrinbosari lavozimiga tayinlandi.
Shuningdek, shu vaqtgacha boshqaruv raisi oʻrinbosari lavozimida ishlab kelgan Dilshod Xojiev oʻz lavozimidan ozod etildi. Endilikda u Kuzatuv kengashi raisining vakili (filiallar tarmogʻi samaradorligi boʻyicha) sifatida faoliyatini davom ettiradi.
