Fitch Kapitalbank reytingini “B+”gacha oshirdi — keyin bankni reytinglashni toʻxtatdi
Fitch Ratings Kapitalbankning uzoq muddatli kredit reytingini “B”dan “B+”gacha oshirdi va prognozni “Barqaror” deb belgiladi. Shundan soʻng agentlik tijoriy sabablarga koʻra bank reytinglarini qaytarib olib, Kapitalbank boʻyicha reyting va tahliliy xizmatlarni toʻxtatdi.
Fitch Kapitalbankning xorijiy va milliy valyutadagi uzoq muddatli emitent defolt reytinglarini “B”dan “B+”gacha, bankning mustaqil moliyaviy holatini aks ettiruvchi Viability Rating’ni esa “b”dan “b+”gacha oshirdi.
Agentlik qarorni Oʻzbekiston bank sektori uchun operatsion muhit yaxshilangani, Kapitalbankning kapital va likvidlik pozitsiyasi mustahkamlangani hamda bank yuqori rentabellikni saqlab qolayotgani bilan izohladi.
Xususan, Kapitalbankning Fitch Core Capital koeffitsiyenti 2025 yil oxiridagi 14,6%dan 2026 yil iyun yakunida 16,4%gacha oshgan. Fitch yuqori foydalilik hisobiga kapital shakllanishi kredit portfeli oʻsishidan tezroq davom etishini kutgan.
Bankning kreditlar va depozitlar nisbati iyun oxirida 82%ni tashkil etgan. Oʻzbekiston bank tizimi boʻyicha oʻrtacha koʻrsatkich esa 137% boʻlgan. Likvid aktivlar mijozlarning jami mablagʻlarining qariyb 40%ini qoplagan.
Shu bilan birga, Fitch ayrim risklarga ham eʼtibor qaratgan. Kapitalbank kredit portfelining yarmidan koʻprogʻi hanuz avtokreditlarga toʻgʻri keladi. Bankning xorijiy valyutadagi kreditlari ulushi esa 2025 yil oxiridagi 41%dan 46%gacha oshgan — bank tizimidagi oʻrtacha 39%dan yuqori.
Fitch 2026 yilda Kapitalbankning operatsion foydasi riskka tortilgan aktivlarning 5%idan pastroq boʻlishini kutgan, biroq bu koʻrsatkich ham sektor oʻrtachasidan sezilarli yuqori boʻlib qolishi qayd etilgan.
Reyting oshirilganidan keyin Fitch Kapitalbank reytinglarini tijoriy sabablarga koʻra qaytarib oldi. Bu bankning kredit sifati yomonlashgani yoki reyting pasaytirilganini anglatmaydi. Aksincha, agentlik reytingni toʻxtatishdan oldin uni bir pogʻonaga oshirgan. Endi Fitch Kapitalbank uchun yangi reyting qarorlari va tahliliy hisobotlarni eʼlon qilmaydi.
Kapitalbank ayni paytda boshqa xalqaro agentliklarda reytingga ega. Moody’s iyulda bankning uzoq muddatli depozit reytingini B1’dan Ba3’ga oshirib, “Barqaror” prognoz bergan. S&P Global Ratings esa bankning “BB-/B” reytinglarini tasdiqlab, prognozni “Barqaror”dan “Ijobiy”ga yaxshilagan.
