Fitch Капиталбанк рейтингини “B+”гача оширди — кейин банкни рейтинглашни тўхтатди

Fitch Капиталбанкнинг хорижий ва миллий валютадаги узоқ муддатли эмитент дефолт рейтингларини “B”дан “B+”гача, банкнинг мустақил молиявий ҳолатини акс эттирувчи Viability Rating’ни эса “b”дан “b+”гача оширди.

Агентлик қарорни Ўзбекистон банк сектори учун операцион муҳит яхшилангани, Капиталбанкнинг капитал ва ликвидлик позицияси мустаҳкамлангани ҳамда банк юқори рентабелликни сақлаб қолаётгани билан изоҳлади.

Хусусан, Капиталбанкнинг Fitch Core Capital коэффициенти 2025 йил охиридаги 14,6%дан 2026 йил июнь якунида 16,4%гача ошган. Fitch юқори фойдалилик ҳисобига капитал шаклланиши кредит портфели ўсишидан тезроқ давом этишини кутган.

Банкнинг кредитлар ва депозитлар нисбати июнь охирида 82%ни ташкил этган. Ўзбекистон банк тизими бўйича ўртача кўрсаткич эса 137% бўлган. Ликвид активлар мижозларнинг жами маблағларининг қарийб 40%ини қоплаган.

Шу билан бирга, Fitch айрим рискларга ҳам эътибор қаратган. Kapitalbank кредит портфелининг ярмидан кўпроғи ҳануз автокредитларга тўғри келади. Банкнинг хорижий валютадаги кредитлари улуши эса 2025 йил охиридаги 41%дан 46%гача ошган — банк тизимидаги ўртача 39%дан юқори.

Fitch 2026 йилда Капиталбанкнинг операцион фойдаси рискка тортилган активларнинг 5%идан пастроқ бўлишини кутган, бироқ бу кўрсаткич ҳам сектор ўртачасидан сезиларли юқори бўлиб қолиши қайд этилган.

Рейтинг оширилганидан кейин Fitch Kapitalbank рейтингларини тижорий сабабларга кўра қайтариб олди. Бу банкнинг кредит сифати ёмонлашгани ёки рейтинг пасайтирилганини англатмайди. Аксинча, агентлик рейтингни тўхтатишдан олдин уни бир поғонага оширган. Энди Fitch Kapitalbank учун янги рейтинг қарорлари ва таҳлилий ҳисоботларни эълон қилмайди.

Kapitalbank айни пайтда бошқа халқаро агентликларда рейтингга эга. Moody’s июлда банкнинг узоқ муддатли депозит рейтингини B1’dan Ba3’га ошириб, “Барқарор” прогноз берган. S&P Global Ratings эса банкнинг “BB-/B” рейтингларини тасдиқлаб, прогнозни “Барқарор”дан “Ижобий”га яхшилаган.