Citigroup Toshkentda vakolatxona ochishni rejalashtirmoqda

AQShning yetakchi moliyaviy institutlaridan biri — Citigroup Toshkent shahrida oʻz vakolatxonasini ochishni koʻzlamoqda. Bu haqda Investitsiyalar, sanoat va savdo vazirligi matbuot xizmati xabar berdi.

Maʼlum qilinishicha, 25 iyun kuni vazirlikda Citigroup’ning mijozlar bilan ishlash boʻyicha bosh direktori Devid Livingston boshchiligidagi delegatsiya bilan uchrashuv boʻlib oʻtgan. Tomonlar Oʻzbekistonga investitsiyalarni jalb etish, eksportni rivojlantirish va davlat-xususiy sheriklik asosidagi loyihalarni kengaytirish masalalarini muhokama qilgan.

Uchrashuvda Citigroup yaqin kunlarda Toshkent shahrida vakolatxona ochishni rejalashtirayotgani taʼkidlangan.

Mazkur kompaniyaning Oʻzbekiston bozoriga qiziqishi yangi emas. Xususan, Citigroup bir necha yirik korxonalarning xalqaro fond bozorlariga chiqishida va IPO jarayonlarida konsultant sifatida ishtirok etgan. 

Jumladan, “Navoiyuran” tomonidan chiqarilishi rejalashtirilayotgan 300 million yevro miqdoridagi yevrobondlar Citigroup va boshqa moliyaviy tashkilotlar hamkorligida joylashtiriladi. Shuningdek, “Navoiy kon-metallurgiya kombinati” tomonidan chiqarilgan 500 million dollarlik obligatsiyalar boʻyicha bukrannerlik (asosiy joylashtiruvchi) funksiyasini ham aynan Citigroup bajargan.