Citigroup Тошкентда ваколатхона очишни режалаштирмоқда

АҚШнинг етакчи молиявий институтларидан бири — Citigroup Тошкент шаҳрида ўз ваколатхонасини очишни кўзламоқда. Бу ҳақда Инвестициялар, саноат ва савдо вазирлиги матбуот хизмати хабар берди.

Маълум қилинишича, 25 июнь куни вазирликда Citigroup’нинг мижозлар билан ишлаш бўйича бош директори Девид Ливингстон бошчилигидаги делегация билан учрашув бўлиб ўтган. Томонлар Ўзбекистонга инвестицияларни жалб этиш, экспортни ривожлантириш ва давлат-хусусий шериклик асосидаги лойиҳаларни кенгайтириш масалаларини муҳокама қилган.

Учрашувда Citigroup яқин кунларда Тошкент шаҳрида ваколатхона очишни режалаштираётгани таъкидланган.

Мазкур компаниянинг Ўзбекистон бозорига қизиқиши янги эмас. Хусусан, Citigroup бир неча йирик корхоналарнинг халқаро фонд бозорларига чиқишида ва IPO жараёнларида консультант сифатида иштирок этган. 

Жумладан, “Навоиюран” томонидан чиқарилиши режалаштирилаётган 300 миллион евро миқдоридаги евробондлар Citigroup ва бошқа молиявий ташкилотлар ҳамкорлигида жойлаштирилади. Шунингдек, “Навоий конь-металлургия комбинати” томонидан чиқарилган 500 миллион долларлик облигациялар бўйича букраннерлик (асосий жойлаштирувчи) функциясини ҳам айнан Citigroup бажарган.