Bir yilda besh yillik rekord yangilandi: Oʻzbekistonda aholining oltinga qiziqishi tarixiy darajaga yetdi
Yil davomida banklar orqali aholiga umumiy ogʻirligi 661 kilogramm boʻlgan 33 939 dona oʻlchovli oltin quyma sotilgan. Bu koʻrsatkich 2020–2024 yillarda sotilgan jami oltin hajmidan (558 kg) 18,4 foizga koʻp boʻlib, soʻnggi besh yillik rekord yangilanganini koʻrsatadi. Xaridlarning asosiy qismi 5 va 10 grammlik quymalar hissasiga toʻgʻri kelmoqda
Markaziy bankning soʻnggi sharhiga koʻra, Oʻzbekistonda aholining oltinga boʻlgan qiziqishi shunchaki oʻsmagan, balki tarixiy darajada oshgan.
Bir yilda besh yillik rekord yangilandi
2025 yil yakunlariga koʻra, banklar orqali aholiga umumiy ogʻirligi 661 kilogramm boʻlgan 33 939 dona oʻlchovli oltin quyma sotilgan.
Eʼtiborli jihati shundaki, birgina 2025 yilda sotilgan oltin hajmi 2020–2024 yillar davomida sotilgan jami oltin hajmidan (558 kg) 18,4 foizga koʻp boʻldi. Bu esa aholining qimmatbaho metallarga investitsiya sifatida qiziqishi keskin ortganini koʻrsatadi.
Tahlillarga koʻra, xaridorlarning aksariyati kichik hajmdagi quymalarni afzal koʻrmoqda. Banklar orqali sotilgan oltinlarning 60 foizdan ortigʻi 5 va 10 grammlik quymalar hissasiga toʻgʻri keladi. Bu holat bozorga asosan chakana investorlar kirib kelayotganidan dalolat beradi.
Oltin daromadlilik boʻyicha depozitlardan ustun
Jahon bozorida oltin narxining muttasil oʻsib borishi uning investitsion jozibadorligini yanada kuchaytirdi.
2025 yilda oʻlchovli oltin quymalarining daromadliligi 54,5 foizni tashkil etdi.
Taqqoslash uchun:
- milliy valyutadagi bank depozitlarining oʻrtacha yillik stavkasi — 19,3 foiz,
- AQSh dollaridagi depozitlar boʻyicha daromadlilik esa 4,8 foiz darajasida qayd etildi.
Endi 0,1 grammdan oltin sotib olish mumkin
2025 yil oxiriga kelib qimmatbaho metallar bozorida muhim raqamli yangiliklar joriy etildi. Yangi nizomga koʻra, fuqarolar banklarning mobil ilovalari orqali “egasizlantirilgan metall hisobvaragʻi” ochish imkoniyatiga ega boʻldi.
Ushbu tizim investorlar uchun jismoniy oltin quymalarini saqlash zaruratini yoʻq qiladi. Endi fuqarolar 0,1 grammdan boshlab oltin sotib olishlari mumkin.
Natijada qisqa vaqt ichida umumiy qiymati 311,7 milliard soʻmlik (169,74 kg) elektron oltin depozitlari shakllantirildi.
