Banklardagi omonatlar boʻyicha oʻrtacha foiz stavkasi ketma-ket uchinchi oy pasaymoqda

Banklardagi omonatlar boʻyicha foiz stavkalarining ommaviy ravishda pasaytirilishi oʻz taʼsirini koʻrsatishda davom etmoqda. Markaziy bank maʼlumotlariga koʻra, milliy valyutadagi omonatlar boʻyicha oʻrtacha foiz stavkasi ketma-ket uchinchi oy pasaygan.

May va iyun oylarida milliy valyutadagi bank depozitlari boʻyicha oʻrtacha tortilgan foiz stavkasi har oyda 0,1 foizga kamaygan. Natijada, ushbu stavka 2024 yil mart oyidagi 21,4 foiz darajasigacha tushib ketdi.

Umuman olganda, milliy valyutadagi omonatlar boʻyicha oʻrtacha foiz stavkasi yil boshiga nisbatan 0,7 foizga, oʻtgan yilning shu davriga nisbatan esa 0,6 foizga pasaygan.

Mazkur holatni banklarning aprel oyidan boshlab omonat foiz stavkalarini 23 foizdan oshmaydigan darajagacha tushirgani bilan izohlash mumkin. Jamoatchilik fikricha, ushbu sinxron oʻzgarishlarga maʼmuriy topshiriq  sabab boʻlgan boʻlishi mumkin.

Aynan shu oʻzgarishdan soʻng, aprel oyida omonat stavkalari 6 oylik uzluksiz oʻsishdan keyin ilk bor pasaygan edi.

Milliy valyutadagi yuridik shaxslar omonatlari boʻyicha oʻrtacha foiz stavkasi may oyida 0,4 foizga oshgan boʻlsa, iyun oyida bu koʻrsatkich oʻzgarishsiz qolgan.

Xorijiy valyutadagi depozitlar

Xorijiy valyutadagi omonatlar boʻyicha oʻrtacha foiz stavkasi may oyida 0,5 foizga pasaydi. Iyun oyida esa bu koʻrsatkich biroz oshib, 4,8 foizga yetdi. Shunga qaramay, bu natija 2024 yil noyabr oyidagiga nisbatan 1,5 foizga pastdir.

Xorijiy valyutadagi yuridik shaxslar omonatlari boʻyicha foiz stavkalarida esa deyarli oʻzgarish kuzatilmadi.