Apple’ning yangi byudjet toifadagi smartfoni – iPhone SE 4 haqida nimalar maʼlum?
Yangi tarqalgan mish-mishlarga koʻra, smartfon avvalgi modelga nisbatan sezilarli darajada yaxshilanadi. Shuningdek, tarmoqda smartfon maketlarining suratlari ham tarqaldi.
Dizayn va displey
iPhone SE 4’ning iPhone 14 ga oʻxshash dizaynda boʻlishi haqidagi mish-mishlar tarqalmoqda. Qayd etilishicha, smartfon 6,06 dyuymdan 6,1 dyuymgacha boʻlgan OLED displeyga ega boʻladi. Bu yangilik hozirgi iPhone SE’ning iPhone 8 ga oʻxshash koʻrinishidan voz kechishni anglatadi. Bundan tashqari, uy tugmasi (Home button) oʻrniga Face ID uchun ekran yuqori qismida kesik paydo boʻlishi kutilmoqda.
Protsessor
Qurilma Apple Intelligence funksiyalarini qoʻllab-quvvatlaydigan A18 chipi bilan chiqarilishi kutilmoqda. Ushbu chip iPhone’ning eng soʻnggi modeli – iPhone 16 da ham ishlatilgan. Shuningdek, smartfon 6-8 Gb operativ xotiraga ega boʻladi.
Kamera
Tarqalgan mish-mishlarga koʻra, iPhone SE 4 modelida bitta 48 megapiksellik orqa kamera oʻrnatilishi kutilmoqda. Shuningdek, qurilmada 2x optik zum ham boʻladi. Old kamera esa Face ID tizimini qoʻllab-quvvatlaydigan 12 megapikselli boʻlishi taxmin qilinmoqda.
Ulanish
iPhone SE 4 Apple tomonidan ishlab chiqarilgan 5G modemini ishlatadigan birinchi qurilma boʻlishi mumkin. Shuningdek, soʻnggi iPhone modellaridagi tendensiyaga muvofiq, Lightning porti oʻrniga USB-C portining qoʻllanilishi kutilmoqda.
Chiqarilish va narx
iPhone SE 4 2025 yil boshida, xususan, mart oyidan may oyigacha boʻlgan davrda taqdim etilishi kutilmoqda. Narxi taxminan 499 dollardan 549 dollargacha boʻladi. Boshqa iPhone modellari narxi bilan taqqoslaganda eng soʻnggi funksiyalarni qoʻllab-quvvatlaydigan, kuchli protsessor va kameraga ega smartfon uchun bu ancha yaxshi narxdir.
Garchi unchalik ishonchli boʻlmasa-da, telefon iPhone 15 Pro’dagidek Action Button’ga ega boʻlishi mumkin. Bundan tashqari, batareya hajmining kattalashishi haqidagi taxminlar ham mavjud.
Tarqalib ketgan suratlar
Insayder Majin Bu X (sobiq Twitter)da iPhone SE maketining suratlari va shuningdek qisqa videoni taqdim etdi. Kutilganidek, qurilmaning orqa tomonida bitta linzali kamera, shisha orqa qism va alyuminiy ramka mavjud. Shuningdek, uning old dizayni taxmin qilingandek, iPhone 14 ga oʻxshab ketadi.
