Apple’нинг янги бюджет тоифадаги смартфони – iPhone SE 4 ҳақида нималар маълум?
Янги тарқалган миш-мишларга кўра, смартфон аввалги моделга нисбатан сезиларли даражада яхшиланади. Шунингдек, тармоқда смартфон макетларининг суратлари ҳам тарқалди.
Дизайн ва дисплей
iPhone SE 4’нинг iPhone 14 га ўхшаш дизайнда бўлиши ҳақидаги миш-мишлар тарқалмоқда. Қайд этилишича, смартфон 6,06 дюймдан 6,1 дюймгача бўлган OLED дисплейга эга бўлади. Бу янгилик ҳозирги iPhone SE’нинг iPhone 8 га ўхшаш кўринишидан воз кечишни англатади. Бундан ташқари, уй тугмаси (Home button) ўрнига Face ID учун экран юқори қисмида кесик пайдо бўлиши кутилмоқда.
Процессор
Қурилма Apple Intelligence функцияларини қўллаб-қувватлайдиган А18 чипи билан чиқарилиши кутилмоқда. Ушбу чип iPhone’нинг энг сўнгги модели – iPhone 16 да ҳам ишлатилган. Шунингдек, смартфон 6-8 Гб оператив хотирага эга бўлади.
Камера
Тарқалган миш-мишларга кўра, iPhone SE 4 моделида битта 48 мегапикселлик орқа камера ўрнатилиши кутилмоқда. Шунингдек, қурилмада 2х оптик зум ҳам бўлади. Олд камера эса Face ID тизимини қўллаб-қувватлайдиган 12 мегапикселли бўлиши тахмин қилинмоқда.
Уланиш
iPhone SE 4 Apple томонидан ишлаб чиқарилган 5G модемини ишлатадиган биринчи қурилма бўлиши мумкин. Шунингдек, сўнгги iPhone моделларидаги тенденцияга мувофиқ, Lightning порти ўрнига USB-C портининг қўлланилиши кутилмоқда.
Чиқарилиш ва нарх
iPhone SE 4 2025 йил бошида, хусусан, март ойидан май ойигача бўлган даврда тақдим этилиши кутилмоқда. Нархи тахминан 499 доллардан 549 долларгача бўлади. Бошқа iPhone моделлари нархи билан таққослаганда энг сўнгги функцияларни қўллаб-қувватлайдиган, кучли процессор ва камерага эга смартфон учун бу анча яхши нархдир.
Гарчи унчалик ишончли бўлмаса-да, телефон iPhone 15 Pro’дагидек Action Button’га эга бўлиши мумкин. Бундан ташқари, батарея ҳажмининг катталашиши ҳақидаги тахминлар ҳам мавжуд.
Тарқалиб кетган суратлар
Инсайдер Мажин Бу Х (собиқ Twitter)да iPhone SE макетининг суратлари ва шунингдек қисқа видеони тақдим этди. Кутилганидек, қурилманинг орқа томонида битта линзали камера, шиша орқа қисм ва алюминий рамка мавжуд. Шунингдек, унинг олд дизайни тахмин қилингандек, iPhone 14 га ўхшаб кетади.
