Apple 599 dollarlik iPhone 17e modelini taqdim etdi
Yangi model A19 chipi, 48 MP kamera va Apple ishlab chiqqan C1X 5G modemi bilan jihozlangan. Qurilmaning boshlangʻich narxi 599 dollarni tashkil qilib, 256 GB xotira va uch xil rangda taqdim etilgan.
Apple 2 mart kuni iPhone 17e modelini rasman taqdim etdi. Bu qurilma iPhone 17 liniyasining kuchli, ammo nisbatan arzon varianti sifatida taqdim etildi. Modelning boshlangʻich narxi 599 dollarni tashkil qiladi va u Appleʼning oʻzida ishlab chiqilgan birinchi 5G modemi kabi muhim apparat yangilanishlarini oʻz ichiga oladi.
Asosiy xususiyatlar va texnik koʻrsatkichlar
Qurilma standart iPhone 17 bilan bir xil boʻlgan A19 chipi bilan ishlaydi. Unda 6 yadroli CPU va 4 yadroli GPU mavjud boʻlib, apparat darajasida ray tracing texnologiyasini qoʻllab-quvvatlaydi.
iPhone 17e Apple tomonidan ishlab chiqilgan yangi C1X modem bilan taqdim etildi. U avvalgi boshlangʻich modellarga qaraganda 2 baravar tezroq va 30% energiya tejamkorroq.
Smartfon 6,1 dyuymli Super Retina XDR OLED displey bilan jihozlangan. Ekranning maksimal HDR yorqinligi 1200 nitni tashkil qiladi va u Ceramic Shield 2 himoya qatlami bilan qoplangan boʻlib, chizilishga qarshi uch baravar mustahkamroq hisoblanadi. Biroq displey 60 Hz yangilanish chastotasi bilan cheklangan va always-on display funksiyasi mavjud emas.
Kamera tizimiga 48 megapikselli Fusion kamera kiradi. U optik sifatdagi 2 karra telefoto imkoniyatini taqdim etadi, 4 Dolby Vision formatida video yozishni qoʻllab-quvvatlaydi hamda yangi avlod portret rejimiga ega.
Shuningdek, iPhone 17eʼda ilk bor MagSafe texnologiyasi qoʻllangan. Bu 15 Vt gacha tez simsiz zaryadlash va turli aksessuarlar bilan ishlash imkonini beradi. Qurilma aerospace-grade alyuminiy korpus, IP68 darajasidagi suv va changdan himoya hamda moslashtiriladigan Action Button bilan taqdim etilgan.
Sotuv va narx
iPhone 17e uchun oldindan buyurtmalar 2026 yil 4 mart kunidan boshlanadi, umumiy sotuv esa 11 martdan yoʻlga qoʻyiladi.
Qurilmaning boshlangʻich narxi AQShda 599 dollar, Buyuk Britaniyada 599 funtni tashkil qiladi. Asosiy model 256 GB xotira bilan taklif etiladi, bu esa avvalgi avlodga nisbatan ikki baravar koʻp. Smartfon uch xil mat rangda — qora, oq va yangi Soft Pink rangida taqdim etiladi.
Shuningdek, Apple shu taqdimotda M4 chipi va 12 GB operativ xotiraga ega yangi iPad Air modelini ham eʼlon qildi.
