2026 yilning eng boy odamlari – Forbes
Joriy yilda dunyodagi milliarderlar soni 3428 nafarga yetib, ularning umumiy boyligi 20,1 trillion dollarni tashkil etdi.
Tesla va SpaceX asoschisi Ilon Mask 839 milliard dollarlik boyligi bilan ketma-ket ikkinchi yil reytingda birinchi oʻrinni egalladi.
Alisher Usmonovning boyligi esa 14,5 mlrd dollarga baholanib, reytingda 199-oʻrinni egallagan.
Nufuzli Forbes nashri 2026 yilning eng boy odamlari roʻyxatini eʼlon qildi. Unga koʻra, bu yil dunyoda milliarderlar soni 3428 nafarga yetdi, ularning jami boyligi esa 20,1 trillion dollarni tashkil etmoqda.
Tesla va SpaceX kompaniyalari egasi Ilon Mask ketma-ket ikkinchi yil Forbes talqiniga koʻra dunyoning eng boy milliarderlari reytingida birinchi oʻrinni egalladi. Uning boyligi 839 milliard dollarga baholanmoqda. Bu oʻtgan yilgi koʻrsatkichdan ($342 mlrd) deyarli 2,5 baravar koʻproqdir.
Top 10 eng boy shaxslar:
| # | Ism | Boylik | Daromad manbai | Davlat |
| 1 | Ilon Mask | $839 mlrd | Tesla, SpaceX | AQSh |
| 2 | Larri Peyj | $257 mlrd | AQSh | |
| 3 | Sergey Brin | $237 mlrd | AQSh | |
| 4 | Jeff Bezos | $224 mlrd | Amazon | AQSh |
| 5 | Mark Sukerberg | $222 mlrd | Meta | AQSh |
| 6 | Larri Ellison | $190 mlrd | Oracle | AQSh |
| 7 | Bernar Arno | $171 mlrd | LVMH | Fransiya |
| 8 | Jensen Xuang | $154 mlrd | NVIDIA | AQSh |
| 9 | Uorren Baffett | $149 mlrd | Berkshire Hathaway | AQSh |
| 10 | Amansio Ortega | $148 mlrd | Zara | Ispaniya |
Mask eng yaqin raqiblaridan ancha oldinda. Reytingda ikkinchi oʻrinni Google asoschilaridan biri Larri Peyj (257 mlrd dollar) egallagan boʻlsa, uchinchi oʻrinda yana bir hammuassis Sergey Brin (237 mlrd dollar) joylashdi. Ularning boyligi oʻtgan yilga nisbatan sezilarli darajada oshgan.
Bu yil 100 milliard dollardan ortiq boylikka ega milliarderlar soni ham rekord darajaga yetib, 20 nafarga chiqdi (oʻtgan yili 15 nafar edi). Ularning qariyb yarmi texnologiya sohasida boylik orttirgan.
Mamlakatlar kesimida esa AQSh milliarderlar soni boʻyicha yetakchi boʻlib qolmoqda — mamlakatda rekord darajadagi 989 nafar milliarder bor. Ulardan 15 nafari reytingdagi eng boy 20 kishilik roʻyxatga kiradi. Ikkinchi oʻrinda Xitoy (Gonkong bilan birga) — 610 nafar, uchinchi oʻrinda esa Hindiston — 229 nafar milliarder bilan qayd etilgan.
