2025 yilning eng yaxshi smartfonlari: Pinkod.uz’dan TOP-10 reyting

2025 yil smartfonlar olami uchun haqiqiy burilish davri boʻldi, desak mubolagʻa boʻlmaydi. Yil boshida Samsung oʻzining Galaxy S25 seriyasi bilan flagmanlar segmentida raqobatni boshlab bergan boʻlsa, sentabr oyida Apple iPhone 17 liniyasi orqali bu bellashuvni yanada keskinlashtirdi. Shu bilan birga, Google, Xiaomi va boshqa yirik ishlab chiqaruvchilar ham texnologik jihatdan kuchli va innovatsion modellarni taqdim etib, bozordagi raqobatni yangi bosqichga olib chiqdi.

Pinkod.uz MKBHD (Marques Brownlee) Smartphone Awards 2025, TechRadar, The Verge, CNET, Tom’s Guide, Android Authority kabi nufuzli nashrlarning yil yakunlari boʻyicha reytinglari, testlari va tahlillariga tayangan holda 2025 yilning eng yaxshi smartfonlari roʻyxatini taqdim etadi.

TOP–10 Smartfonlar Reytingi

1. Samsung Galaxy S25 Ultra

Ushbu model koʻplab yetakchi texnologik nashrlar — jumladan Tom’s Guide, TechRadar va Android Authority tomonidan 2025 yilning eng kuchli Android flagmani sifatida eʼtirof etildi.

Qurilmaga oʻrnatilgan Snapdragon 8 Elite protsessori yuqori unumdorlik va barqaror ishlashni taʼminlasa, 6,9 dyuymli Dynamic AMOLED 2X displey bozordagi eng sifatli ekranlardan biri sifatida eʼtirof etilmoqda. 200 MP asosiy kamera hamda 5x va 10x periskop zum imkoniyatlari professional darajadagi suratga olishni taʼminlaydi.

Shuningdek, S Pen qoʻllab-quvvatlashi va Galaxy AI funksiyalari ushbu smartfonni nafaqat qudratli texnik qurilma, balki kundalik foydalanish uchun ham nihoyatda qulay vositaga aylantiradi.

2. iPhone 17 Pro Max

Koʻplab nufuzli texnologik nashrlar ushbu modelni hozirgi kunda eng kuchli iPhone sifatida eʼtirof etmoqda va umumiy reytinglarda unga ikkinchi oʻrin berilgan. A19 Pro chipi yuqori tezlik va barqaror ishlashni taʼminlab, kundalik foydalanishdan tortib professional vazifalargacha mukammal unumdorlikni namoyish etadi.

48 MP uch kamerali tizim ProRes Log va 4K 120 fps video yozish imkoniyati bilan professional darajadagi kontent yaratishga yoʻl ochadi. 55 soatdan ortiq batareya ishlash vaqti, iOS 26ʼdagi Liquid Glass interfeysi hamda Apple Intelligence funksiyalari qurilmani yanada qulay va aqlli qiladi.

Aynan shu jihatlari sababli ZDNET va CNET nashrlari ushbu modelni “yilning eng muvozanatli Pro smartfoni” deya baholagan.

3. Google Pixel 10 Pro / Pro XL

DXOMARK va The Verge nashrlari ushbu modelni “eng yaxshi kamera va sunʼiy intellekt tajribasiga ega smartfon” deya eʼtirof etdi.

Tensor G5 protsessori ilgʻor AI imkoniyatlarini toʻliq namoyon etib, suratga olishdan tortib kundalik foydalanishgacha boʻlgan barcha jarayonlarda yuqori aniqlik va tezkorlikni taʼminlaydi.

Shuningdek, 7 yillik dasturiy yangilanish va xavfsizlik kafolati qurilmani uzoq muddat davomida ishonchli hamrohga aylantiradi. Aynan shu jihatlari sabab u koʻplab ekspertlar tomonidan “eng aqlli Android-smartfon” sifatida eʼtirof etilmoqda.

4. Apple iPhone 17 (Bazaviy model)

Yilning eng katta syurprizlaridan biri aynan shu model boʻldi. U MKBHD Smartphone Awards 2025 marosimida “Phone of the Year” unvoniga sazovor boʻldi. Eng muhim yangilik shundaki, 120 Hz ProMotion displey, telefoto kamera va ilgari faqat Pro modellarga xos boʻlgan bir qator imkoniyatlar endi oddiy versiyada ham taqdim etildi.

Shu orqali Apple ilk bor haqiqatan ham “hamma uchun yetarli boʻlgan iPhone” konsepsiyasini toʻliq roʻyobga chiqardi va keng auditoriya uchun muvozanatli, kuchli hamda zamonaviy qurilma yaratdi.

5. OnePlus 13 (yoki 15 seriyasi)

Android Authority tomonidan "Muharrir tanlovi" mukofotiga sazovor boʻlgan ushbu smartfon oʻzining yuqori unumdorligi bilan ajralib turadi.

Snapdragon 8 Elite protsessori, 6000 mAh’dan ortiq ulkan batareya va 100W tezkor zaryadlash texnologiyasi uni ham oʻyin, ham ogʻir vazifalar uchun ishonchli “monstr’’ga aylantiradi.

6. Vivo X300 Pro 

Vivo X300 Pro hozirgi paytda mobil fotografiya ixlosmandlari uchun eng kuchli kamera-flagmanlardan biri sifatida tilga olinmoqda.

Smartfon 6510 mAh sigʻimli baquvvat batareya va rekord darajadagi 4500 nit yorqinlikka ega LTPO AMOLED displey bilan jihozlangan.

7. Xiaomi Ultra 15

GSMArena va NotebookCheck tomonidan "Best Cameraphone 2025" (Yilning eng yaxshi kamerafoni) deb eʼtirof etilgan.

Qurilma Snapdragon 8 Elite chipi va 6100+ mAh batareya bilan taʼminlangan boʻlib, uzoq vaqt davomida yuqori sifatli kontent yaratish imkonini beradi.

8. Honor Magic7 Pro 

Yuqori darajadagi texnologiyalarni oʻzida jamlagan haqiqiy flagmanlardan biri sifatida eʼtirof etiladi. Qurilma Snapdragon 8 Elite Gen 5 protsessori bilan jihozlangan boʻlib, maksimal unumdorlik va barqaror ishlashni taʼminlaydi. 5600 mAh sigʻimli batareya real foydalanishda bemalol ikki kungacha yetishi bilan ajralib turadi.

Smartfon 200 MP asosiy kamera va periskop telefoto modul bilan jihozlangan boʻlib, ayniqsa tungi suratga olish va uzoq masofali zumda yuqori natijalarni namoyish etadi. 6,8 dyuymli LTPO AMOLED displey (4500 nit yorqinlik) esa nafaqat silliq tasvir, balki eng yorugʻ sharoitda ham mukammal koʻrinishni taʼminlaydi.

9. Nothing Phone(3)

Texnologiya va estetika uygʻunligi. The Verge va Android Authority tomonidan "Eng oʻziga xos dizayn" deya baholangan.

Nothing’ning 2025-yilgi flagmani Snapdragon 8s Gen 4 chipi, 5000 mAh batareya va ortiqcha ilovalardan xoli toza Nothing OS tizimi bilan keladi. U individualizmni qadrlaydiganlar uchun ideal tanlov.

10. Samsung Galaxy S25 (bazaviy model)

Ixchamlik va muvozanatni qadrlaydigan foydalanuvchilar uchun ideal tanlov. Galaxy S25 flagman darajasidagi imkoniyatlarni ixcham va qulay korpusda taklif qiladi.

Ultra versiyadan farqli oʻlaroq, ushbu model yengil, ergonomik va bir qoʻl bilan boshqarish uchun juda mos. Kundalik foydalanishda qulaylikni birinchi oʻringa qoʻyadiganlar uchun ayni muddao.

120 Hz yangilanish tezligiga ega 6,3 dyuymli AMOLED displey, kuchli Snapdragon 8 Elite protsessori hamda 50 MP uchtalik kamera tizimi yuqori sifatli ishlashni hech qanday murosasiz taʼminlaydi.