Bank of America томонидан ўтказилган тадқиқотга кўра, Z авлоди яқин келажакда дунёдаги энг бой авлодга айланиши кутилмоқда. Прогнозларга кўра, уларнинг умумий даромади кейинги беш йил ичида 36 триллион долларга, 2040-йилга бориб эса 74 триллион долларга етади.

Z авлоди кимлар ва уларнинг бойлиги қаердан келмоқда?

Z авлоди — 1997-2012-йиллар оралиғида туғилган одамларни ифодаловчи демографик гуруҳ бўлиб, улар “зумерлар” деб ҳам аталади. Ушбу авлод рақамли дунёда улғайган, технологияга боғлиқлиги юқори ва тез ўзгарувчан жамиятга мослашишга қодир.

Тадқиқот натижаларига кўра, Z авлодининг молиявий имкониятлари қуйидаги асосий омиллар ҳисобига ўсмоқда:

Мерос олиш – Baby Boomer’лар (1946-1964 йилларда туғилганлар) авлоди катта миқдордаги активларни Z авлодига қолдирмоқда.
Юқори даромадли соҳаларга кириш – Z авлоди технология, молия ва тадбиркорлик каби юқори даромадли соҳаларда фаол иштирок этмоқда.
Инвеститсияга эрта қизиқиш – фонд бозори, криптовалюталар ва кўчмас мулк каби соҳаларга аввалги авлодларга қараганда анча ёшлигидан сармоя киритмоқда.

Z авлод пулларни қандай бошқармоқда?

Молиявий имкониятлари кенгайиб бораётганига қарамай, кўплаб Z авлоди вакиллари ота-оналарининг ёшлигига нисбатан молиявий жиҳатдан орқада эканликларини ҳис қилишади. Бироқ, уларнинг молияга бўлган ёндашуви олдинги авлодлардан сезиларли даражада фарқ қилади.

Зумерлар жамғарма йиғишдан кўра, сайёҳат, кўнгилочар тадбирлар ва шахсий ривожланиш курсларига кўпроқ маблағ сарфлайди. Шу билан бирга, улар рақамли хизматларга катта қизиқиш билдириб, асосий харажатларини оқимли (streaming) платформалар, видео ўйинлар ва онлайн таълим хизматларига йўналтиради. Аввалги авлодлар билан солиштирганда, Z авлоди фарзанд тарбиясига ҳам сезиларли даражада кўпроқ маблағ ажратади.

Гарчи Z авлоди улкан бойлик орттираётган бўлса-да, уларнинг молиявий мустақиллигига таъсир қилувчи бир қатор муаммолар мавжуд:

Уй-жой, таълим ва тиббий хизмат нархларининг ошиши – ушбу харажатларнинг кескин кўтарилиши ёшларнинг молиявий барқарорлигига жиддий таъсир кўрсатмоқда.
Иш бозори ўзгарувчанлиги ва инфлятсия – келажакдаги молиявий хавфсизликка таҳдид солувчи асосий омиллардан бири.
Қарз муаммоси – кредит карталарига бўлган юқори талаб ёшлар орасида кенг тарқалган ташвишлардан бири ҳисобланади.

Z авлодининг молиявий келажаги қандай шаклланишини вақт кўрсатади, аммо уларнинг ҳозирги ёндашуви молиявий дунёнинг келгуси йўналишларини белгилаши аниқ.

Z авлоди (зумерлар) тарихдаги энг бой авлодга айланмоқда — тадқиқот