Катта ёшдагилар ChatGPT‘ни Google ўрнида, ёшлар эса маслаҳатчи сифатида ишлатмоқда — Сэм Альтман
OpenAI раҳбари Сэм Альтман ChatGPT’дан фойдаланиш одатлари авлодларга қараб кескин фарқ қилишини айтди. Унинг фикрича, Gen Z вакиллари сунъий интеллектни оддий қидирув воситаси эмас, балки ҳаётни бошқаришга ёрдам берадиган тизим сифатида кўрмоқда.
ChatGPT тобора такомиллашиб боргани сари, ундан амалий фойдаланиш имкониятлари ҳам кенгайиб бормоқда. OpenAI бош директори Сэм Альтманнинг айтишича, турли авлод вакиллари ChatGPT’дан турлича фойдаланади.
“Бу жуда умумлаштирилган фикр, лекин катта ёшдагилар ChatGPT’дан кўпроқ Google ўрнида фойдаланади. 20–30 ёшдагилар уни ҳаётий маслаҳатчи сифатида ишлатиши мумкин. Коллеж талабалари эса ундан деярли операцион тизимдек фойдаланмоқда”, — деди Альтман Sequoia Capital’нинг AI Ascent тадбирида.
Gen Z ChatGPT’дан қандай фойдаланмоқда?
Альтманнинг таъкидлашича, ёшлар ChatGPT’ни оддий қидирув воситаси сифатида эмас, балки кундалик ҳаётини бошқаришга ёрдам берадиган тизим сифатида ишлатмоқда. Улар уни турли файллар билан боғлайди, мураккаб созламалардан фойдаланади ва керакли prompt’ларни ёдлаб олади ёки алоҳида сақлаб қўяди.
“Менимча, буларнинг барчаси жуда қизиқ ва таъсирли”, — деди Альтман. “Яна бир жиҳат бор: улар ChatGPT’дан сўрамасдан туриб деярли ҳаётий қарорлар қабул қилишмайди”.
OpenAI’нинг 2025 йилда эълон қилган ҳисоботига кўра, АҚШда коллеж ёшидаги ёшлар ChatGPT’дан энг фаол фойдаланаётган гуруҳлардан бири ҳисобланади. Ҳисоботда 18–24 ёшдаги фойдаланувчиларнинг учдан бир қисмидан кўпроғи ChatGPT’дан фойдаланиши қайд этилган.
Ёш фойдаланувчилар учун ChatGPT’нинг аввалги суҳбатларни эслаб қолиш имконияти ҳам муҳим аҳамиятга эга. Альтманнинг айтишича, модель фойдаланувчининг ҳаётидаги одамлар, улар билан бўлган суҳбатлар ва турли вазиятлар бўйича кенг контекстга эга бўлиши мумкин.
Ҳисоботларга кўра, одамлар ChatGPT’дан муносабатлар бўйича маслаҳат олиш, бизнес ғояларни муҳокама қилиш, тиббий саволларга жавоб излаш ва ҳатто психологик кўмак сифатида фойдаланмоқда.
Бироқ мутахассислар ChatGPT’дан муҳим ҳаётий қарорлар бўйича маслаҳат олиш масаласида якдил фикрда эмас. Айрим тадқиқотчилар хавфсизлик, тиббиёт ёки шахсий ҳаётга оид масалаларда сунъий интеллект жавобларини мутахассис фикри билан текшириш зарурлигини таъкидлайди. Бошқа томондан, айрим тадқиқот ва тажрибалар ChatGPT оддий маслаҳатлар беришда фойдали бўлиши мумкинлигини кўрсатмоқда.
Альтман эса ёшлар ва катта авлод вакилларининг ChatGPT’дан фойдаланиш услуби ўртасидаги фарқ жуда катта эканини айтди.
“Бу менга смартфонлар энди чиққан даврни эслатади. Болалар ундан жуда тез ва яхши фойдаланишни ўрганиб олган эди. Катта ёшдагиларга эса оддий функцияларни тушуниб олиш учун ҳам анча вақт керак бўлган”, — деди у.
