Лондон фонд биржасида рўйхатдан ўтган TBC Bank Group (“TBC PLC”) Ўзбекистондаги энг йирик онлайн эълонлар платформаси OLX Uzbekistan’нинг назорат пакетини сотиб олиш бўйича келишувга эришди. Битим Prosus’га қарашли OLX Group билан имзоланди.

Ушбу келишув TBC Uzbekistan’га янги мижоз сегментларига чиқиш имконини беради. OLX Uzbekistan мамлакатда энг кўп ташриф буюриладиган олтинчи сайт бўлиб, ойига 5,4 миллион фаол фойдаланувчи ва 2,2 миллион фаол эълон билан хизматлар, товарлар, транспорт ва кўчмас мулк бозорида етакчи майдонча ҳисобланади. Платформа Ўзбекистоннинг фаол интернет фойдаланувчиларининг 20 фоизидан ортиғини қамраб олади.

Сотиб олиш учун TBC Bank Group халқаро инвестиция холдинги Titan Investments билан қўшма корхона (ЖВ) тузди. Унга кўра, OLX Uzbekistan’нинг 100 фоизи қўшма корхона ихтиёрига ўтади. TBC Bank Group улушларнинг 50% + 1 акциясига, Titan Investments эса қолган қисмига эгалик қилади. Битим якунланиши учун одатий тартибий тасдиқлардан ўтиши лозим. Шунга қарамай, OLX ўз бренди остида фаолият юритишда давом этади.

TBC Uzbekistan бош директори Ника Курдиани битим ҳақида шундай деди:

“Бугунги кунда бизнинг экотизимимиз 21 миллион ноёб фойдаланувчини қамраб олади – бу Ўзбекистон аҳолиси ярмидан кўпроғини ташкил этади. Биз тезкор ўсишда давом этяпмиз ва мижозларимизга молиявий ҳамда турмуш эҳтиёжларини ягона қулай платформа орқали ҳал қилиш имконини яратмоқдамиз. OLX Узбекистанъни сотиб олиш – кенгайиш ва диверсификация стратегиямиздаги навбатдаги мантиқий қадамдир.”

Titan Investments ҳақида

Titan Investments – тез ўсаётган рақамли компаниялар, жумладан онлайн эълонлар платформаларига сармоя киритишга ихтисослашган халқаро инвестиция холдинги. Унинг инвесторлар базасида Яқин Шарқдаги йирик институционал инвесторлар, оилавий офислар ва суверен жамғармалар мавжуд. Titan жамоаси портфель компаниялари билан фаол ҳамкорлик қилиб, бизнес стратегияларини оптималлаштиради, жамоаларни мустаҳкамлайди ва жараёнларни такомиллаштиради.

TBC Bank Group OLX Uzbekistan’нинг назорат пакетини сотиб олмоқда