Instagram ўзининг Instagram Plus номли пуллик обуна хизматини синовдан ўтказишни бошлади. Бу ҳақда TechCrunch нашри Meta компаниясининг расмий хатига таяниб хабар берди.

Компания қайси давлатларда синов ўтказилаётганини расман очиқламаган. Бироқ ижтимоий тармоқларда тарқалган маълумотларга кўра, хизмат ҳозирча Мексика, Япония ва Филиппинда тест қилинмоқда. Нархлар мамлакатга қараб фарқланади: Мексикада — ойига 39 песо (тахминан $2,2), Японияда — 319 иена (тахминан $2), Филиппинда эса 65 песо (тахминан $1,07) этиб белгиланган.

Instagram Plus обунаси бир қатор янги функцияларни тақдим этади. Масалан, фойдаланувчилар ҳикояларни муаллифга билдирмасдан кўриш, шунингдек, ўз Story’ларини нечта фойдаланувчи қайта кўрганини кузатиш имкониятига эга бўлади.

Бундан ташқари, обуначилар “Яқин дўстлар” рўйхатидан ташқари чексиз аудитория рўйхатлари яратишлари мумкин. Бу эса контентни фақат умумий аудиторияга ёки битта ёпиқ гуруҳга эмас, балки турли гуруҳларга бўлиб улашиш имконини беради.

Янги функциялар орасида Story’ни яна 24 соатга узайтириш, ҳафтасига бир марта ҳикояни ажратиб кўрсатиш орқали уни обуначилар учун ҳикоялар панелининг юқори қисмида чиқариш имконияти ҳам мавжуд.

Шунингдек, фойдаланувчилар бошқаларнинг ҳикояларига анимацияли “Superlike” юборишлари ҳамда Story кўрганлар рўйхатида маълум бир фойдаланувчини тез қидириш функциясидан фойдаланишлари мумкин.

Таъкидланишича, Instagram Plus обунаси Meta Verified хизматидан алоҳида ҳисобланади. Meta Verified асосан контент яратувчилар ва бизнес саҳифаларига мўлжалланган бўлса, Instagram Plus оддий фойдаланувчилар учун ишлаб чиқилган

Instagram янги пуллик обуна — Instagram Plus’ни синовдан ўтказмоқда