16–18 июнь кунлари Тошкентда ўтказилаётган Бешинчи Тошкент халқаро инвестиция форуми доирасида Amazon Leo компанияси ҳамда “UZ-SAT” қўшма корхонаси ўртасида ҳамкорлик келишуви имзоланди.

Келишув Ўзбекистон ҳудудида юқори тезликдаги сунъий йўлдош интернет хизматларини тарқатишни назарда тутади. Лойиҳа орқали фойдаланувчилар шаҳарлардан ташқари, анъанавий телекоммуникация инфратузилмаси чекланган ёки умуман мавжуд бўлмаган олис аҳоли пунктларида ҳам кенг полосали интернетдан фойдаланиши мумкин бўлади.

Amazon Leo интернет сигналини Ернинг паст орбитасидаги сунъий йўлдошлар орқали етказиб беради. Бу эса оптик толали тармоқ ёки мобил алоқа инфратузилмасини қуриш мураккаб ва қиммат бўлган ҳудудларда интернет хизматларини тезроқ йўлга қўйиш имконини яратади.

Компания тизими 3 мингдан ортиқ сунъий йўлдошдан иборат бўлиши кўзда тутилган. Улар юқори тезликдаги оптик алоқа каналлари орқали ўзаро боғланиб, ер устидаги глобал шлюз станциялари, толали-оптик тармоқлар ва интернет алмашинув нуқталари билан интеграция қилинади.

Фойдаланувчилар тармоққа Amazon Leo Nano, Amazon Leo Pro ва Amazon Leo Ultra номли ихчам антенналар ёрдамида уланиши мумкин. Қурилмалар турли тоифадаги мижозлар — оддий фойдаланувчилар, бизнес субъектлари, давлат ташкилотлари ва йирик корхоналар эҳтиёжларига мослаштирилган.

Лойиҳа Ўзбекистонда рақамли тенгсизликни камайтириш, чекка ҳудудлардаги мактаблар, тиббиёт муассасалари, тадбиркорлик субъектлари ва аҳолини барқарор интернет билан таъминлашга хизмат қилиши мумкин.

Бироқ томонлар хизматни амалда ишга тушириш муддати, тарифлар, қамров ҳудуди ва фойдаланувчи ускуналарининг нархи ҳақида ҳозирча маълумот бермаган.

Amazon Leo сунъий йўлдош интернети Ўзбекистонда ишга туширилади