Ўзбекистонда илк бор микромолия банки ташкил этилди. Бу ҳақда Марказий банк матбуот хизмати хабар берди.

Марказий банк Бошқарувининг 2025 йил 24-октабрдаги 27/7-сонли қарорига мувофиқ, “Tayyab Finance Микромолия Ташкилоти” акциядорлик жамиятига микромолия банки фаолиятини амалга ошириш учун расмий лицензия берилди.

Шу муносабат билан “Tayyab Finance” микромолия ташкилоти фаолияти “TAYANCH” микромолия банки фаолиятига айлантирилди. Ҳозирда бу бўйича тегишли реестрларда зарур ўзгаришлар киритилмоқда, дейилади Марказий банк хабарида.

“Tayyab Finance” микромолия ташкилоти 2022 йилда ташкил этилган бўлиб, 2025 йил июль ойида микромолия банкига айланиш учун Марказий банкдан дастлабки рухсатнома олган эди.

Маълумотларга кўра, янги микромолия банкининг таъсисчилари ва бошқарув жамоаси илгари йирик тижорат ҳамда рақамли банкларда фаолият юритган тажрибали банк мутахассисларидан иборат.

Эслатиб ўтамиз, жорий йил февраль ойида қабул қилинган қонун билан Ўзбекистонда микромолия банклари фаолияти ва уларга лицензия бериш тартиби қонунчиликда илк бор мустаҳкамлаб қўйилган эди.

“Банклар ва банк фаолияти тўғрисида”ги қонунга киритилган ўзгартиришларга кўра:

микромолия ташкилотлари микромолия банкига айланиши,
микромолия банклари эса тижорат банки фаолиятига ўтиши,
тижорат банклари микромолия банки сифатида фаолият юритиши,
шунингдек, микромолия банклари қайта ташкил этилиб, микромолия ташкилоти шаклида ишлаши мумкин.

Кейинги микромолия банки — “Агат”

Шунингдек, “Агат Credit” АЖ ҳам ўз фаолият шаклини микромолия ташкилотидан микромолия банкига ўзгартириш жараёнини бошлаб юборган.

2025 йил 21-октабр куни жамият акциядорларининг навбатдаги умумий йиғилишида “Агат Credit” фаолиятини микромолия ташкилотидан микромолия банки шаклига ўтказиш тўғрисида қарор қабул қилинган.

“Таянч Микромолия Банки” бошқарув раиси Зоҳид Алимов лавозимидан озод қилинди

Ўзбекистонда биринчи микромолия банкига лицензия берилди