Ҳукуматнинг 2026-йил 17-сентябрдаги 501-сон қарори билан педагогларнинг давлат олий таълим ташкилотларига ўқишга кирган ва таҳсил олаётган фарзандларига контракт бўйича чегирма бериш тартиби тасдиқланди.

Янги тартиб 2026/2027-ўқув йилидан бошлаб қўлланилади. Унга кўра, педагогларнинг давлат ОТМлари бакалавриат босқичида кундузги таълим шаклида ўқиётган фарзандлари учун тўлов-контракт суммаси 30 фоизга камайтирилади.

Чегирма қуйидаги талабаларга татбиқ этилмайди:

олий ҳарбий ва ҳарбийлаштирилган таълим ташкилотларида ўқиётганларга;
Ўзбекистонда фаолият юритаётган хорижий ОТМлар ва уларнинг филиаллари талабаларига;
қўшимча ва табақалаштирилган тўлов-контракт асосида таҳсил олаётганларга;
хорижий ҳамкор ОТМларнинг қўшма таълим дастурлари ва факультетларида ўқиётганларга;
нодавлат олий таълим ташкилотлари талабаларига.

Агар педагогнинг бир нечта фарзанди давлат ОТМларида контракт асосида ўқиётган бўлса, 30 фоизлик чегирма ҳар бир фарзанд учун алоҳида ҳисобланади.

Чегирмани олиш учун талаба kontrakt.edu.uz тизими орқали тўлов-контракт шартномасини олиш бўйича ариза юборади. Талабанинг ота ёки онаси педагог экани “Рақамли ҳукумат” тизимининг идоралараро интеграциялашув платформаси орқали текширилади.

Маълумот тасдиқланса, 30 фоизлик чегирма автоматик равишда қўлланилади. Ариза масъул ташкилот томонидан икки иш куни ичида кўриб чиқилиши керак.

Чегирма ҳар бир ўқув йили учун бир марта берилади. Агар талабанинг ота ёки онаси педагог тоифасидан чиқарилса, кейинги ўқув йилидан бошлаб имтиёз қўлланилмайди.

Мазкур тартибнинг лойиҳаси 2026-йил май ойида жамоатчилик муҳокамасига қўйилган эди. Лойиҳа ҳам давлат ОТМларининг кундузги бакалавриатида таҳсил олаётган педагоглар фарзандларига 30 фоизлик чегирма беришни назарда тутган.

Педагоглар фарзандлари учун бундай имтиёз жорий этилиши аввалроқ Президент томонидан ҳам эълон қилинган эди. Расмий хабарда келгуси ўқув йилидан давлат олийгоҳларига кирган педагоглар фарзандларининг контрактига 30 фоиз чегирма берилиши кўзда тутилаётгани айтилган.

Педагоглар фарзандлари контрактига 30 фоиз чегирма берилади