Ўзбекистон Республикаси Президентининг иш ҳақи, пенсиялар, стипендиялар ва нафақалар миқдорини ошириш тўғрисидаги фармони қабул қилинди.

Мазкур фармонга кўра, 2025 йил 1 июлдан бошлаб пенсиялар, ижтимоий нафақалар, кам таъминланган оилаларга тўланадиган болалар нафақаси ва моддий ёрдам тўловлари 10 фоизга оширилади.

2025 йил 1 августдан эса бюджет ташкилотлари ходимларининг иш ҳақи, талабалар ва ўқувчиларнинг стипендиялари ҳам 10 фоизга кўтарилади.

Шунингдек, ушбу фармон билан базавий миқдорлар ҳам ўзгаради. 1 июлдан бошлаб пенсияни ҳисоблашнинг базавий миқдори ойига 471 000 сўм этиб белгиланади. 1 августдан бошлаб эса меҳнатга ҳақ тўлашнинг энг кам миқдори 1 271 000 сўм, базавий ҳисоблаш миқдори эса 412 000 сўмни ташкил этади (аввал 375 000 сўм эди).

Бу ўзгаришлар айрим жарима миқдорларига ҳам бевосита таъсир қилади. Масалан, 2025 йил 1 августдан бошлаб ҳайдовчиларнинг белгиланган тезликни ошириши учун жарималар қуйидагича бўлади:

Тезликни соатига 20 км гача оширгани учун — 412 000 сўм (айни вақтда 375 000 сўм);
Тезликни 20–40 км оралиғида оширгани учун — 2 060 000 сўм (айни вақтда 1 875 000 сўм);
Тезликни 40–60 км оралиғида оширгани учун — 3 708 000 сўм (айни вақтда 3 375 000 сўм);
Тезликни 60 км дан ортиқ оширгани учун — 6 180 000 сўм (айни вақтда 5 625 000 сўм).

1 августдан бошлаб жарималар миқдори ҳам кўтарилади