Йил бошидан бери аҳолига қайтарилган кешбек ҳажми 400 миллиард сўмдан ошди
Январь-апрель ойларида 5,4 миллион фойдаланувчи Солиқ мобил иловаси орқали 472,6 миллионта чекни рўйхатдан ўтказган.
Давлат солиқ қўмитаси берган маълумотларга кўра, 2025 йилнинг дастлабки тўрт ойида аҳолига харидлар учун жами 412,6 миллиард сўм миқдорида кешбек тўлаб берилган. Фақатгина апрель ойининг ўзида эса 105,6 миллиард сўмлик кешбек қайтарилган.
Январь-апрель ойларида 5,4 миллион фойдаланувчи Солиқ мобил иловаси орқали 472,6 миллионта чекни рўйхатдан ўтказган. Улардан 112,2 миллион чек апрель ойида рўйхатдан ўтказилган.
Ҳудудлар кесимида кўрилганда, апрель ойида энг кўп кешбек Тошкент шаҳрига тўғри келган – 42,2 миллиард сўм. Ундан кейинги ўринларда Тошкент вилояти – 11 миллиард сўм, Самарқанд вилояти – 7,9 миллиард сўм, Фарғона вилояти – 7,2 миллиард сўм ва Андижон вилояти – 5,1 миллиард сўм қайд этилган.
Шунингдек, 2025 йилнинг дастлабки тўрт ойи якунларига кўра, кешбек маблағлари қуйидагича тақсимланган:
- Тошкент шаҳри – 170,5 миллиард сўм
- Тошкент вилояти – 41,2 миллиард сўм
- Самарқанд вилояти – 33,8 миллиард сўм
- Фарғона вилояти – 26,95 миллиард сўм
- Андижон вилояти – 19,5 миллиард сўм
