Евроиттифоқнинг навбатдаги санкциялар пакетига T-Bank, Yandex Bank ва Ozon Bank киритилди
Янги чоралар молиявий институтлар, энергетика инфратузилмаси ва “соя флоти” кемаларини нишонга олган. Санкциялар қаторига кирганлар қаторида T-Bank, Yandex Bank ва Ozon Bank ҳам бор.
Европа Иттифоқи 2025 йил 18 июль куни Россияга қарши навбатдаги — 18-санкциялар пакетини эълон қилди. Мазкур санкциялар тўғрисидаги ҳужжат Европа Иттифоқининг расмий ҳуқуқий порталида эълон қилинди.
Бу пакет Россиянинг молиявий, транспорт, энергетика ва саноат соҳаларига нисбатан янги чекловларни ўз ичига олади.
Энг диққатга сазовор жиҳатлардан бири шуки, санкциялар рўйхатига 22 та Россия банки киритилди. Жумладан, T-Bank, Yandex Bank, Ozon Bank ва Сургутнефтегазбанк каби молиявий муассасалар эндиликда Европа Иттифоқи ҳудудида фаолият юрита олмайди.
Шу билан бирга, Yandex Bank ва Ozon Bank санкциялар уларнинг кундалик фаолиятига жиддий таъсир кўрсатмаганини маълум қилди.
Янги пакетда Россиянинг яширин нефть ташувчи кемалар тармоғи — “соя флоти”га ҳам жиддий зарба берилди. Янгиланган рўйхатга 105 та қўшимча танкер киритилди. Натижада, санкцияга учраган кемалар сони 444 тага етди. Бу танкерлар Россия нефтини санкцияларни четлаб ташишда восита сифатида ишлатилаётгани айтилмоқда.
Шунингдек, Россия нефтининг экспорт нархига қўйилган $60 лик чегара бекор қилиниб, эндиликда динамик нархлаш тизими жорий этилди. Янги тартибга кўра, Россия нефтининг нархи глобал ўртача бозор нархидан 15 фоиз паст бўлиши белгиланган. Шу билан бирга, минимум нарх $47,60 дан паст бўлиши мумкин эмас. Бу чора-тадбирлар Россиянинг нефтдан тушадиган даромадларини камайтириш ва халқаро бозор барқарорлигини сақлашга қаратилган.
Янги санкциялар Россиянинг газ инфратузилмасига ҳам таъсир кўрсатди. Хусусан, “Nord Stream” қувурлари орқали газ етказиб бериш тўлиқ тақиқланди. Шунингдек, Россия Тўғридан-тўғри Инвестиция Жамғармаси (РДИФ) ва унинг шўба корхоналарига оид ҳар қандай молиявий операциялар тақиқланмоқда.
Европа Комиссиясининг таъкидлашича, RDIF Россиянинг глобал молиявий бозорларга кириш воситаси сифатида фойдаланилиб, санкцияларни четлаб ўтиш, хорижий валюталарни жалб қилиш ва уруш иқтисодиётини қўллаб-қувватлашда фаол роль ўйнаб келмоқда.
