Январь-май ойларида савдо соҳасидаги товар айланмаси $23,9 млрдни ташкил қилди

2025 йилнинг январь-май ойларида савдо соҳасида фаолият юритаётган корхоналар томонидан амалга оширилган умумий товар айланмаси 303,2 трлн сўмга етди. Бу ҳақда Солиқ қўмитаси хабар берди. 

Марказий банкнинг амалдаги курси бўйича бу кўрсаткич тахминан 23,9 млрд АҚШ долларига тенг.

Давр давомида савдо соҳаси томонидан жами 14,4 трлн сўмлик солиқ тўланган бўлиб, уларга 1,6 трлн сўмлик солиқ имтиёзлари қўлланилган. Энг кўп солиқ тўлаган 20 та корхона томонидан эса 20,9 трлн сўмлик товар айланмаси амалга оширилган ва улар жами 1,1 трлн сўмлик солиқ тўлаган. Ушбу ТОП-20 корхоналарга берилган солиқ имтиёзлари ҳажми эса 55,2 млрд сўмни ташкил қилган.

Бу ТОП-20 корхонанинг умумий савдо соҳасидаги улуши қуйидагича:

• товар айланмасида – 6,9%,
• тўланган солиқларда – 7,6%,
• солиқ имтиёзларида – 3,4%.

ТОП-20 корхонадан тушган солиқларнинг турлари бўйича тақсимоти қуйидагича:

• Қўшилган қиймат солиғи (ҚҚС) – 398,4 млрд сўм (36,2%)
• Акциз солиғи – 223,4 млрд сўм (20,3%)
• Фойда солиғи – 215,3 млрд сўм (19,5%)
• Жисмоний шахслардан олинадиган даромад солиғи – 149,9 млрд сўм (13,5%)
• Ижтимоий солиқ – 92,1 млрд сўм (8,4%)
• Мол-мулк солиғи – 15,3 млрд сўм (1,4%)
• Бошқа солиқлар – 7,6 млрд сўм (0,7%)

Энг кўп солиқ тўлаган савдо корхоналари орасида биринчи ўринни 153,1 миллиард сўмлик солиқ билан Korzinka бренди остида фаолият юритувчи Anglesey Food эгаллади. Ундан кейинги ўринларда мос равишда Total Oil Invest– 126,6 миллиард сўм ва Uzum Market – 107,4 миллиард сўм билан жойлашган. Улар ортидан UNG Petro, “Наманган-Истиқлол боғи”, ASR and CO, Grand Pharm Trade, Nestle Food, Alif Moliya, Balton Trading (Asia) каби йирик савдо субъектлари қайд этилган.

Шунингдек, рўйхатда Samsung Uzbekistan, Lactalis Central Asia, Unico Hierro, Lukoil Uznefteprodukt ва AC Energy каби маҳаллий ва хорижий сармоядорлар иштирокидаги йирик корхоналар ҳам мавжуд.