Uzcard ёки Humo: 9 ойда ким кўпроқ фойда олди?
Uzcard ва Humo 2025 йилнинг 9 ойи якунига оид молиявий натижаларини эълон қилди. Унга кўра, Uzcardʼнинг соф фойдаси Humo’никидан 4 баробар юқорироқ бўлган.
Ўзбекистондаги икки йирик тўлов тизими Uzcard ва Humo 2025 йилнинг 9 ойи якуналари бўйича молиявий ҳисоботларини эълон қилди. Pinkod ушбу маълумотлар асосида компаниялар фаолияти натижаларини таққослади.
Даромад
Ҳисобот даврида Uzcard’нинг асосий фаолиятдан олинган даромади 1,52 трлн сўмни ташкил этди. Humo тизимининг даромадлари эса 380,9 млрд сўм бўлди. Яъни, Uzcard даромади Humo даромадидан тахминан 4 баробар юқори.
Соф фойда
Uzcard’нинг соф фойдаси 929,97 млрд сўмни ташкил қилди. Бу кўрсаткич ўтган йилнинг мос даврига нисбатан 40,7 фоизга ошган. 2024 йилнинг шу даврида компания 660,5 млрд сўм фойда олган эди.
Uzcard йилнинг 9 ойида Ўзбекистондаги 35 та банкнинг 31 тасидан кўра кўпроқ фойда кўрсаткичига эришди. Фақат Миллий банк, СҚБ, Ҳамкорбанк ва КапиталбанкUzcard’dan юқори натижа қайд этган.
Humo эса 2025 йил январь–сентябрь ойларида 223,97 млрд сўм соф фойда кўрсаткичига эришди. Бу ўтган йилга нисбатан 87,7 фоизга кўп. Uzcard соф фойдаси ҳам 4 баробар юқорироқ.
Шунга қарамасдан, Humo’нинг фойдаси Uzcard’никидан юқорироқ суръатда ўсган. Бу ҳолат Humo хусусийлаштирилгандан сўнг тарифлар нархини кўтаргани билан боғлиқ бўлиши мумкин.
