UzAuto Motors’нинг 9 ойлик соф фойдаси қарийб икки баравар камайди
UzAuto Motors 9 ойда 1,87 трлн сўм соф фойда олди. Бу ўтган йилнинг мос даврига нисбатан 46,9 фоиз ёки 1,65 трлн сўмга кам. Тушум қисқарган бир пайтда сотиш харажатлари ошиб, фойда маржаси пасайган.
UzAuto Моторс 2026 йилнинг январь–сентабр ойларида 1,87 трлн сўм соф фойда олди. Бу ҳақда компаниянинг молиявий ҳисоботида маълум қилинган.
Соф фойда ўтган йилнинг мос даврига нисбатан 46,9 фоизга камайган. 2025 йилнинг тўққиз ойида компания 3,52 трлн сўм фойда олган эди.
Ҳисобот даврида тушум 34,71 трлн сўмдан 30,12 трлн сўмга тушган. Бу 13,2 фоиз ёки 4,59 трлн сўмга кам.
Сотиш таннархи эса тушумга нисбатан секинроқ — 11,2 фоизга камайиб, 27,17 трлн сўмни ташкил этган. Натижада ялпи фойда 28,2 фоизга қисқариб, 2,94 трлн сўмга тушган.
Тушум камайганига қарамай, сотиш харажатлари 14,3 фоизга ошиб, 1,17 трлн сўмга етган. Маъмурий харажатлар эса 609,1 млрд сўмдан 582,4 млрд сўмга камайган.
| Кўрсаткич | 2025 йил январь–сентябрь | 2026 йил январь–сентябрь | Ўзгариш |
|---|---|---|---|
| Тушум | 34,71 трлн сўм | 30,12 трлн сўм | −13,2% |
| Сотиш таннархи | 30,61 трлн сўм | 27,17 трлн сўм | −11,2% |
| Ялпи фойда | 4,10 трлн сўм | 2,94 трлн сўм | −28,2% |
| Операцион фойда | 2,96 трлн сўм | 1,30 трлн сўм | −56,2% |
| Соф фойда | 3,52 трлн сўм | 1,87 трлн сўм | −46,9% |
Операцион фаолиятнинг бошқа даромадлари ҳам 333 млрд сўмдан 61 млрд сўмга тушган. Шу тариқа, компаниянинг операцион фойдаси 2,96 трлн сўмдан 1,30 трлн сўмга ёки 56,2 фоизга камайган.
Валюта курси фарқидан олинган фойда 726,3 млрд сўмдан 173,9 млрд сўмга қисқарган. Қарзлар ва молиявий ижара бўйича фоиз харажатлари эса 9,1 фоизга ошиб, 525,1 млрд сўмни ташкил этган.
Компаниянинг соф фойда маржаси 10,1 фоиздан 6,2 фоизга тушган.
Балансга кўра, UzAuto Motors’нинг захиралари йил бошидаги 11,70 трлн сўмдан сентабр охирида 17,57 трлн сўмга етган. Ўсиш 5,87 трлн сўм ёки 50,2 фоизни ташкил этган. Захиралар компания жами активларининг қарийб ярмини эгаллаган.
Айни даврда пул маблағлари ва уларнинг эквивалентлари 1,33 трлн сўмдан 257,2 млрд сўмга камайган. Савдо ва бошқа қисқа муддатли кредиторлик қарзлари эса 3,07 трлн сўмдан 5,99 трлн сўмга ошган.
30-сентабр ҳолатига компаниянинг жами активлари 35,31 трлн сўмни, мажбуриятлари 17,99 трлн сўмни, хусусий капитали эса 17,32 трлн сўмни ташкил этган.
