“Трастбанк” Кузатув кенгаши таркибида ўзгаришлар юз берди
“Трастбанк” акциядорлари банк Кузатув кенгаши аъзолари сонини 7 нафардан 9 нафарга оширишни маъқуллади. Кенгаш таркибига Жасурбек Атаниязов ва Михаил Давыдкин номзодлари киритилиши белгиланган.
“Трастбанк” ХАБ акциядорлари банк Кузатув кенгаши аъзолари сонини 7 нафардан 9 нафарга ошириш бўйича қарор қабул қилди. Кенгаш таркибига қўшимча равишда Жасурбек Атаниязов ва Михаил Давыдкин номзодлари киритилиши режалаштирилмоқда.
“Трастбанк” ХАБ акциядорларининг 22 май куни бўлиб ўтган умумий йиғилишида Кузатув кенгаши таркибини кенгайтириш масаласи кўриб чиқилди.
Йиғилиш баённомасига кўра, банк акциядорлари реестридаги ўзгаришлардан сўнг 18 май ҳолатига банк акциядорлари сони 1 188 нафарга етган. Амалдаги тартибга мувофиқ, акциядорлари сони 1 минг нафардан ортиқ бўлган жамиятларда Кузатув кенгаши камида 9 кишидан иборат бўлиши керак. Шу сабабли кенгаш таркибини 7 нафардан 9 нафарга ошириш таклиф қилинган.
Мазкур масала бўйича акциядорлар Кузатув кенгаши сонини 9 кишидан иборат этиб белгилашни бир овоздан маъқуллаган.
Шунингдек, Кузатув кенгаши таркибига қўшимча равишда Жасурбек Ҳамидович Атаниязов ва Михаил Викторович Давыдкин номзодлари киритилиши белгиланган. Уларнинг номзодлари Марказий банк билан келишилганидан ҳамда банк уставига тегишли ўзгартиришлар белгиланган тартибда рўйхатдан ўтказилганидан сўнг кенгаш таркибига киритилади.
