Трамп смартфонлар ва бошқа электрон қурилмаларни юқори бож тарифлардан озод қилди
Маълум бўлишича ушбу истиснолар Хитойдан олиб кириладиган маҳсулотларга ҳам тааллуқли.
Доналд Трамп АҚШга импорт қилинадиган смартфон, компьютер ва бошқа электрон қурилмаларни ўзи жорий қилган божлардан озод қилди. Бу ҳақда Bloomberg хабар берди.
Маълумотларга кўра, ушбу истиснолар Хитойдан олиб кириладиган маҳсулотларга ҳам тааллуқли. Трамп маъмурияти аввалроқ мазкур мамлакатга нисбатан 145 фоизлик божлар жорий қилган эди.
Доналд Трампнинг Truth Social ижтимоий тармоғидаги постида таъкидланишича, мазкур тоифадаги маҳсулотлар тўлиқ божлардан озод қилинмаган ва компаниялар ҳали ҳам 20 фоиз миқдорида бож тўлашда давом этади.
Мазкур пасайтиришлар 390 миллиард долларлик импортга, шу жумладан Хитойдан олиб кириладиган 101 миллиард доллардан ортиқ маҳсулотларга тааллуқлидир.
Умуман олганда, бу истиснолар 2024 йилда Хитойдан АҚШга импорт қилинган маҳсулотларнинг тахминан 22 фоизини ташкил этган истеъмол электроникаси ва яримўтказгичларни ўз ичига олади.
Хитой томони бу янгиликни аввалги хатоларни тузатиш йўлидаги кичик қадам сифатида баҳолаган.
Мазкур хабар эълон қилинганидан сўнг, таъминот занжири Хитойга боғлиқ бўлган, айниқса Apple каби технология гигантларининг акциялари тезликда ўсмоқда.
