Трамп оиласи ўз криптовалютаси орқали бойлигини $5 млрдга оширди
WLFI токенлари савдоси Трамп оиласининг бойлигини рекорд даражада ошириб, уларнинг анъанавий даромад манбаи бўлган кўчмас мулкни ҳам ортда қолдирди.
АҚШ президенти Доналд Трамп оиласи янги WLFI криптовалютаси савдоси бошланганидан кейин ўз бойлигини қарийб 5 миллиард долларга оширди. Бу ҳақда The Wall Street Journal хабар берди.
WLFI — World Liberty Financial компаниясига тегишли бўлиб, унда Трампнинг ўғиллари таъсисчи, президентнинг ўзи эса “фахрий таъсисчи” сифатида қайд этилган. Трамп оиласи барча токенларнинг деярли чорак қисмига эгалик қилади.
Савдонинг бошланиши уларнинг активларининг бозор қийматини аниқлаш имконини берди ва бу қиймат Трампларнинг кўп йиллик кўчмас мулк портфели қийматидан ошиб кетди.
World Liberty Financial бир йил аввал Трампнинг сайловолди кампанияси даврида ташкил этилган бўлиб, у лойиҳанинг “Американи яна буюк қилишга, бу сафар криптовалюта ёрдамида” кўмаклашишини таъкидлаган эди.
World Liberty Financial ўсиши АҚШ ҳукуматининг рақамли валюталарни қўллаб-қувватлаш сиёсати ва крипто бозорини енгиллаштиришга қаратилган қарорлари билан изоҳланмоқда.
Бугунги кунда Трамп оиласининг активлари таркиби хилма-хил. Улар орасида кроссовкалар, атирлар, смартфонлар ишлаб чиқариш бўйича лицензия битимлари ҳам мавжуд. Аммо сўнгги йилларда криптовалюталар улуши сезиларли даражада ортиб, кўчмас мулк соҳасидаги анъанавий бизнесдан кўпроқ фойда келтира бошлади.
Аввалроқ Доналд Трампнинг мемкоини $TRUMP’ni сотиб олган 813 000 дан ортиқ крипто ҳамён эгалари жами $2 млрд йўқотгани ҳақида хабар берилган эди.
