Тошкентдаги 35 та бозор ва савдо объекти сотувга қўйилади
Тошкентдаги 13 та бозор ва савдо мажмуаси, уларнинг 21 та филиали ҳамда битта автотураргоҳ оммавий савдоларга чиқарилади. Рўйхатдаги объектлар жами 91,9 гектар ер майдони ва 519,4 минг квадрат метр бино-иншоотларни эгаллайди.
Президентнинг 27 июлдаги ПҚ–279-сон қарори билан оммавий савдоларга чиқариладиган бозорлар, савдо комплекслари ва уларнинг филиаллари рўйхати тасдиқланди.
Сотувга чиқариладиган асосий объектлар орасида:
- 6 та деҳқон бозори — Наврўз, Сергели, Авиасозлар, Қорақамиш, Фарҳод ва Қўйлиқ;
- 4 та савдо комплекси — Чилонзор буюм савдо комплекси, Бек тўпи, Паркент универсал ва Ўрикзор;
- 2 та ихтисослашган бозор — Сергели машина бозори ва Янгиобод бозори;
- “Бешқўрғон савдо” мажмуаси бор.
Бундан ташқари, Наврўз деҳқон бозорининг еттита, Сергели деҳқон бозорининг олтита, Қорақамиш деҳқон бозорининг бешта, Юнусобод деҳқон бозорининг иккита ва Янгиобод бозорининг битта филиали сотувга чиқарилади.
Рўйхатга Чилонзор буюм савдо комплексига қарашли, Бек тўпи савдо комплекси ёнида жойлашган 0,48 гектарлик автотураргоҳ ҳам киритилган. Бек тўпи савдо комплексининг ўзи эса алоҳида объект сифатида сотувга қўйилади.
Ер майдони бўйича энг йирик объект Сергели машина бозори ҳисобланади. У 23,7 гектар ҳудудни эгаллайди, бино ва иншоотларининг умумий майдони эса 60,7 минг квадрат метрни ташкил этади.
Кейинги ўринларда Янгиобод ихтисослашган бозори — 15,1 гектар ва Чилонзор буюм савдо комплекси — 12,2 гектар билан турибди. Бино ва иншоотлар майдони бўйича Чилонзор буюм савдо комплекси етакчи — 137,9 минг квадрат метр.
Объектлар тегишли компанияларнинг бошқарув органлари қарорлари асосида оммавий савдоларга чиқарилади. Бунда бозорларнинг давлат улуши ёки уларга тегишли бино ва иншоотлар сотилиши мумкин.
Савдога тайёргарлик доирасида “Тошкент инвест компанияси” объектларнинг бош режасини ишлаб чиқади. Компанияга сотувдан тушган маблағнинг 1 фоизи ҳамда савдони ташкил этиш харажатлари ўтказилади.
Харидорлар бозорлар ўрнида замонавий экобозор, савдо ва хизмат кўрсатиш объектлари, кўнгилочар марказлар ҳамда кўп қаватли автотураргоҳлар ташкил этиши керак бўлади.
