Тошкент телеминорасининг 100 фоизлик улуши “Ўзбектелеком”га ўтди
Тошкент телеминораси оператори бўлган “Радиоалоқа, радиоэшиттириш ва телевидение маркази” МЧЖнинг 100 фоизлик улуши “Ўзбектелеком” АКга ўтказилди. Шунингдек, “Алоқалойиҳа” МЧЖнинг ҳам худди шу миқдордаги улуши компания ўтди.
Тошкент телеминорасининг 100 фоизлик улуши “Ўзбектелеком” АК тасарруфига ўтказилди. Бу ҳақда компаниянинг корпоратив ахборотидан маълум бўлди.
Акцияларнинг 10 фоиз ва ундан ортиқ улушига эга юридик шахслар рўйхатидаги ўзгаришларга кўра, “Радиоалоқа, радиоэшиттириш ва телевидение маркази” МЧЖнинг 100 фоизлик улуши эндиликда “Ўзбектелеком” АКга тегишли.
Мазкур МЧЖ Ўзбекистондаги энг баланд иншоот бўлган Тошкент телеминорасининг юридик эгаси ва оператори ҳисобланади. Компания, шунингдек, Ўзбекистон давлат телевидение ва радиоэшиттириш тармоғининг техник оператори вазифасини ҳам бажаради.
Маълумот учун, Тошкент телевизион маркази 1956 йил 5 ноябрда Ўрта Осиёда биринчи бўлиб ишга туширилган.
Шунингдек, яна бир ўзгаришга кўра, “Алоқалойиҳа” МЧЖнинг 100 фоизлик улуши ҳам “Ўзбектелеком” АКга ўтказилди.
“Алоқалойиҳа” МЧЖ Ўзбекистонда алоқа ва ахборот технологиялари соҳасида лойиҳалаштириш ишларини амалга оширувчи корхоналардан бири бўлиб, 1958 йил 4 июлда ташкил этилган.
Президентнинг 2023 йил 24 мартдаги ПҚ-102-сон қарорига мувофиқ “Алоқалойиҳа”даги 100% давлат улуши оммавий савдолар орқали тўлиқлигича сотилиши белгиланган эди.
Маълумот учун, компания устав фондини капиталлаштириш ва қўшимча акциялар чиқариш жараёни муносабати билан Тошкент Республика фонд биржасида “Ўзбектелеком” АК акциялари билан савдолар 25 февралдан бошлаб икки ойга тўхтатилган. Жамият қўшимча акциялар чиқариш орқали устав фондини 326,2 млрд сўмдан 978,5 млрд сўмга етказишни режалаштирмоқда.
