Тошкент фонд биржаси индекси бир ҳафтада қарийб 24%га тушди

“Тошкент” Республика фонд биржаси маълумотларига кўра, UCI индекси бир ҳафта ичида 554,03 бандга ёки 23,8%га пасайди. Ҳафта бошидан олдинги кўрсаткич қарийб 2 324 банд бўлган бўлса, 18 сентябрь савдолари якунида индекс 1 769,73 бандни ташкил этди.

Пасайиш ҳафтанинг дастлабки тўрт савдо кунида давом этди. 14 сентябрда индекс 2,5%га, 15 сентябрда 10,2%га, 16 сентябрда 11,5%га ва 17 сентябрда яна 10,1%га тушди. 18 сентябрь куни эса UCI 9,5%га ўсиб, 1 616,86 банддан 1 769,73 бандгача тикланди.

Шу билан бирга, биржадаги ҳафталик савдо ҳажми ҳам кескин камайган. Барча савдо майдончаларидаги айланма 120,98 млрд сўмни ташкил этиб, аввалги ҳафтага нисбатан 92,9%га қисқарган. Битимлар сони эса аксинча 1,97%га ошиб, 49 172 тага етган.

Бироқ савдо ҳажмидаги бундай катта пасайиш бозор фаоллигининг бир ҳафтада 13 баробар камайганини тўлиқ англатмайди. Аввалги ҳафтадаги юқори база асосан 10 сентябрь куни Давр Банк акциялари билан амалга оширилган 1,65 трлн сўмлик битим ҳисобига шаклланган эди. Шу куни биржанинг барча майдончаларидаги савдо ҳажми ҳам қарийб 1,65 трлн сўмни ташкил этган.

14–18 сентябрь ҳафтасида акциялар бозоридаги савдолар ҳажми 15,16 млрд сўм бўлди. Энг катта айланма UPOS акцияларида қайд этилиб, 3,94 млрд сўмни ташкил этди. Кейинги ўринларда UZMK — 2,07 млрд сўм ва UZTL — 1,93 млрд сўм билан турибди.

Облигациялар бозорида эса ҳафталик савдо ҳажми 105,82 млрд сўмга етди. Бунинг 102,42 млрд сўми ёки қарийб 97%и Uzum’нинг UZUMS3B2 облигацияларига тўғри келган.

Таққослаш учун, олдинги ҳафтада UCI кескин ўсишларни ҳам қайд этган эди. 7 сентябрда индекс 11,6%, 8 сентябрда 13%, 9 сентябрда эса яна 13,4%га кўтарилган. 10 сентябрда эса 13,8%лик пасайиш кузатилган. Бу сўнгги икки ҳафтада индексдаги ўзгарувчанлик кескин ошганини кўрсатади.

Биржа ҳафталик шарҳида UCI индексининг 23,8%лик пасайишига аниқ сабаб келтирмаган. Шу сабаб бу кўрсаткични Ўзбекистон фонд бозорининг умумий қиймати 24%га камайди, деб талқин қилиш тўғри эмас. UCI — индекс таркибидаги қимматли қоғозлар нархлари асосида ҳисобланадиган кўрсаткич бўлиб, унинг ўзгариши бутун бозор капиталлашувининг худди шу нисбатда ўзгаришини англатмайди.

18 сентябрь ҳолатига “Тошкент” фонд биржасида 2026 йил бошидан амалга оширилган савдоларнинг умумий ҳажми 14,18 трлн сўм ёки 1,18 млрд долларни ташкил қилган. Шундан 10,08 трлн сўми биржа котировкалаш варағидаги, 4,09 трлн сўми эса листингдан ташқари қимматли қоғозлар билан савдоларга тўғри келади.