Telegram’да катта ҳажмдаги постлар учун AI асосидаги қисқа хулосалар пайдо бўлди
Telegram 2026 йилдаги илк янгиланиш доирасида катта ҳажмдаги постларни AI ёрдамида тезкор қисқача баён қилиш имкониятини жорий этди. Ундан ташқари янгиланиш IOS фойдаланувчилари учун янги дизайнни ҳам ўз ичига олади.
Telegram 2026 йилдаги илк янгиланишини тақдим қилди. У AI асосидаги хулосалар, янгиланган дизайн ва бошқа бир қатор янгиликларни ўз ичига олади.
AI асосидаги қисқа хулосалар
Каналлардаги узун постлар эндиликда бир зумда қисқача баён қилинади. Бу сўнгги янгиликларни тезда кўздан кечириш ва унумдорликни сақлаб қолиш учун амалга оширилган. Instant View саҳифаларида эса AI хулосаси юқори қисмда автоматик кўрсатилади.
Янги AI хулосалари Cocoon тармоғида ишловчи очиқ манбали моделларга асосланади. Ҳар бир сўров фойдаланувчи маълумотларини ҳимоялаш учун шифрланади.
Cocoon’ни исталган AI иловасига интеграция қилиш мумкин. Батафсил маълумот ишлаб чиқувчилар ҳужжатларида келтирилган.
Янги дизайн
IOS операцион тизими учун ишланган Telegram эндиликда тўлиқ Apple’нинг Liquid Glass интерфейсини қўллаб қувватлайди. Бутун илова бўйлаб шаффоф элементлар ва чиройли синиш (refraction) эффектлари мавжуд.
Интерфейс эффектларини унумдорликни ошириш ва батарея қувватини тежаш учун Созламалар > Қувватни тежаш бўлимида бошқариш мумкин.
2025 йилда Telegram
2025 йилда Telegram 13 та йирик янгиланиш доирасида 75 дан ортиқ янги функцияни ишга туширди. Telegram хабар беришича, агар Apple текширувчилари қишки таътилни бу қадар жиддий қабул қилмаганида, бу янгиланишлар сони 14 тага етган бўларди.
Янгиланишлар орасидаги ўртача вақт 26 кунни ташкил этди, айрим ҳолларда эса атиги 8 кунни ташкил қилган — масалан, хавфсиз гуруҳ қўнғироқлари ва совғалар бозори ишга туширилган ҳафта.
