TBC Bank’нинг 9 ойлик соф фойдаси 89 фоизга камайди
Жорий йилнинг 9 ойида банк соф фойдаси 30,3 млрд сўмни ташкил этди. Бу кўрсаткич ўтган йилнинг шу даврига нисбатан 244 млрд сўмга ёки 88,9%га кам.
TBC Bank 2025 йилнинг январь–сентябрь ойларидаги молиявий натижаларини эълон қилди. Ҳисоботга кўра, банкнинг соф фойдаси кескин камайган.
Мазкур даврда банкнинг соф фойдаси 30,3 млрд сўмни ташкил этди. Бу кўрсаткич ўтган йилнинг шу даврига нисбатан 244 млрд сўмга ёки 88,9%га кам. Таққослаш учун, 2024 йилнинг 9 ойида TBC Bank 274,4 млрд сўм соф фойда қайд этган эди.
Шунга қарамай, банкнинг фоизли даромадлари сезиларли ўсишни кўрсатди. 2025 йилнинг 9 ойида TBC Bank 3,2 трлн сўм фоизли даромад олган, бу ўтган йилга нисбатан 92,6% кўп. Фоизсиз даромадлар эса 700 млрд сўмни ташкил этди.
Операцион харажатларгача бўлган соф даромад 684 млрд сўмни ташкил этди. Бироқ операцион харажатлар кескин ошгани туфайли якуний фойда камайди. Ҳисоботга кўра, банк бу йил операцион харажатларга 607,8 млрд сўм, яъни ўтган йилга нисбатан икки баравар кўпроқ маблағ сарфлаган.
Ходимлар билан боғлиқ харажатлар ҳам камайган. Корпоратив маълумотга кўра, ходимлар ойлиги ва бошқа харажатлар учун 31,8 млрд сўм сарфланган бўлиб, бу ўтган йилга нисбатан 382,7 фоизга камроқ.
Барча харажатлар чегирилгандан сўнг TBC Bank’нинг соф фойдаси 30,3 млрд сўм бўлган. Давр давомида банк томонидан тўланган солиқлар миқдори 45,9 млрд сўмга етди.
