SpaceX акциялари пасайиши ортидан Илон Маск триллионер мақомини йўқотди

Илон Маск SpaceX акцияларининг пасайиши ва технология компаниялари фонд бозоридаги оммавий сотувлар ортидан триллионер мақомини йўқотди. Bloomberg Billionaires Index ҳисоб-китобига кўра, унинг бойлиги 957 млрд долларга тушган.

Маск 12 июнь куни SpaceX’нинг тарихий IPOсидан сўнг дунёдаги илк триллионерга айланганди. Компания акциялари 135 доллардан жойлаштирилиб, биринчи савдо кунини 160,95 долларда якунлаган. IPO давомида SpaceX 75 млрд доллар жалб қилган.

Кейинги кунларда акциялар нархи 211,39 долларгача кўтарилди. Бироқ 22 июнга келиб улар уч кун ичида 27 фоиз арзонлашиб, 154,60 долларгача тушди. Натижада SpaceX’нинг бозор қиймати қарийб 400,8 млрд долларга камайиб, 2,04 трлн доллар атрофида шаклланди.

23 июндаги савдоларда SpaceX акциялари дастлаб 147,11 долларгача тушган, кейинчалик эса тикланиб, 164,04 долларгача кўтарилган. Компания акцияларининг кескин тебраниши унинг юқори баҳоланиши ва катта миқдордаги харажатларига нисбатан инвесторлар хавотири билан изоҳланмоқда.

Маск бойлигининг камайишига Tesla акцияларининг пасайиши ҳам таъсир кўрсатди. Компания қимматли қоғозлари сешанба кунги савдоларда 5,79 фоизга арзонлаган. SpaceX ва Tesla акцияларидаги йўқотишлар натижасида Маскнинг бойлиги қисқа вақт ичида 1,1 трлн доллардан 957 млрд долларга тушган.

Айрим ҳисоб-китобларга кўра, SpaceX акциялари чўққидан пасайиши ортидан Маскнинг бойлиги бир ҳафта ичида 350 млрд долларгача қисқарган. Шунга қарамай, у дунёнинг иккинчи энг бой инсонидан катта фарқ билан олдинда қолмоқда.

SpaceX акцияларининг пасайишига компаниянинг йирик қарз жалб этиши, сунъий интеллект лойиҳаларига катта харажатлар режалаштираётгани ҳамда IPOдан кейинги юқори баҳоланишнинг барқарорлигига доир шубҳалар сабаб бўлган. Компания 2025 йилда 18,7 млрд доллар даромад олган бўлса-да, 4,9 млрд доллар зарар кўрган.