Шавкат Мирзиёев Корея билан янги “Ипак йўли”ни яратишни таклиф қилди
Жанубий Кореянинг The Chosun газетасида Президент Шавкат Мирзиёевнинг “Ўзбекистон ва Корея Республикаси: ўзгаришлар даврида келажак сари интилаётган ҳамкорлик” сарлавҳали мақоласи чоп этилди.
Унда Жанубий Корея билан замонавий ишлаб чиқариш занжирлари, рақамли тармоқлар, транспорт ва энергетика йўлакларини боғлайдиган янги “Ипак йўли”ни шакллантириш ғояси илгари сурилган.
Президент Шавкат Мирзиёев Жанубий Корея билан ҳамкорликни замонавий ишлаб чиқариш занжирлари, рақамли тармоқлар, транспорт ва энергетика йўлаклари орқали янги босқичга олиб чиқишни таклиф қилди.
Бу ҳақда Шавкат Мирзиёевнинг Жанубий Кореянинг The Chosun Daily нашрида 14 сентябрь куни эълон қилинган мақоласида сўз боради. Мақола президентнинг Корея Республикасига ташрифи ва “Марказий Осиё — Корея Республикаси” саммити арафасида чоп этилган.
Шавкат Мирзиёевнинг қайд этишича, қадимда Ипак йўли нафақат савдо, балки ғоялар, билимлар, технологиялар ва одамларни бирлаштирган. Энди унинг замонавий шаклини ишлаб чиқариш занжирлари, рақамли тармоқлар, транспорт йўналишлари, энергетика йўлаклари ва инсонлар ўртасидаги алоқалар орқали қайта шакллантириш имконияти пайдо бўлмоқда.
Президент Ўзбекистон Корея билан ҳамкорликда алоҳида инвестиция лойиҳаларидан умумий ишлаб чиқариш тизимлари, технологик платформалар ва янги бозорларни шакллантиришга ўтиши мумкинлигини таъкидлади. Ўзбекистон глобал қўшилган қиймат занжирларига чуқурроқ интеграциялашишни, Жанубий Корея эса уларни янада диверсификация қилишни мақсад қилмоқда.
Бунинг учун корейс компаниялари учун Ўзбекистонда юқори технологияли ва ишлаб чиқариш жараёни чуқур маҳаллийлаштирилган корхоналар ташкил этишга шароит яратиш таклиф қилинмоқда.
Ҳамкорликнинг истиқболли йўналишлари сифатида сунъий интеллект, стратегик материаллар ва ярим ўтказгичлар ишлаб чиқариш, робототехника, электр транспорти, биофармацевтика, замонавий кимё, “ақлли” қишлоқ хўжалиги ва “ақлли” шаҳарлар кўрсатилди.
Ҳозирга қадар Жанубий Кореянинг Ўзбекистон иқтисодиётига киритган жами инвестициялари 8 млрд доллардан ошган. Мамлакатда 700 дан ортиқ қўшма корхона ва лойиҳа фаолият юритмоқда. KOICA, Корея Эксимбанки ва корейс жамғармалари билан шакллантирилган лойиҳалар портфели эса 3,5 млрд доллардан юқори. Сўнгги йилларда икки мамлакат ўртасидаги товар айирбошлаш ҳажми беш баробар ошган.
Шавкат Мирзиёев янги ҳамкорлик моделини фақат Ўзбекистон билан чекламасликни таклиф қилмоқда. Унинг фикрича, Жанубий Корея компаниялари Марказий Осиёда бир вақтнинг ўзида бир нечта мамлакат ва тармоқларни қамраб олувчи комплекс лойиҳаларни амалга ошириши мумкин.
Президент келтирган маълумотларга кўра, Марказий Осиё мамлакатларида ўртача иқтисодий ўсиш суръати 7 фоиздан юқори. Минтақанинг умумий ЯИМи 2025 йилда 500 млрд доллардан ошган.
16 сентябрь куни Сеулда илк бор “Марказий Осиё — Корея Республикаси” саммити давлат раҳбарлари даражасида ўтказилиши кутилмоқда. Саммит якунида Сеул декларацияси қабул қилиниши, инвестициялар, инфратузилма, инновациялар ва маданий-гуманитар ҳамкорлик бўйича янги келишувларга эришилиши кўзда тутилган.
