Ўзбекистонликлар энг кўп қайси банкдан кредит олган? – 2026 йил ҳолатига кўра

2026 йил 1 январь ҳолатига кўра, йил якунида Ўзбекистон банк тизимининг жами кредит портфели 604 трлн сўмни ташкил этди. 

Бу кўрсаткич АҚШ долларида қарийб 50,3 млрд долларга тенг. Бир йил давомида тижорат банкларининг кредит портфели 70,9 трлн сўмга ёки 13 фоизга ошди.

Жисмоний шахсларга ажратилган кредитлар ҳажми 202,3 трлн сўмга етди. Шундан 79,4 трлн сўми ипотека кредитлари, 69,1 трлн сўми эса микроқарзлар ҳиссасига тўғри келади. Сўнгги бир йил ичида ўзбекистонликлар олган микроқарзлар ҳажми 63 фоизга кўпайди.

Pinkod ўзбекистонликлар энг кўп қайси банклардан кредит олишини таҳлил қилди. Рўйхат жисмоний шахсларга ажратилган кредитлар ҳажми асосида шакллантирилди.

1. Ипотека банк — 27,8 трлн сўм

Ипотека банкнинг жами кредит портфели 35,4 трлн сўмни ташкил этади. Шундан 27,8 трлн сўми аҳолига ажратилган кредитлар ҳиссасига тўғри келади. Сўнгги бир йил ичида ушбу кўрсаткич 4 трлн сўмдан кўпроққа ошган.

Банк умумий кредит портфели бўйича етакчи бўлмаса-да, аҳолига кредит бериш ҳажми бўйича мамлакатда биринчи ўринда туради.

2. Халқ банки — 23,6 трлн сўм

Халқ банкининг жами кредит портфели 33,6 трлн сўмни ташкил этади. Унинг 70,1 фоизи, яъни 23,6 трлн сўми аҳолига ажратилган кредитлар ҳиссасига тўғри келади.

Банк ижтимоий йўналтирилган кредитлар, истеъмол кредитлари ҳамда пенсия хизматлари билан машҳур. Халқ банки Ўзбекистоннинг энг қадимги молиявий институтларидан бири бўлиб, унинг тарихи XIX аср охирига бориб тақалади.

3. Ўзмиллийбанк — 22,3 трлн сўм

“Ўзмиллийбанк” мамлакатдаги энг йирик кредит портфелига эга банк ҳисобланади — 116,1 трлн сўм. Бироқ портфелнинг асосий қисми юридик шахсларга ажратилган (83,1 трлн сўм).

Аҳолига берилган кредитлар ҳажми 22,3 трлн сўмни ташкил этади. Июнь ойидаги таҳлилда банк Халқ банкидан кейин 3-ўринни эгаллаган эди.

4. Капиталбанк — 19,9 трлн сўм

Капиталбанкнинг жами кредит портфели 36,3 трлн сўмни ташкил қилади. Портфель нисбатан мувозанатлашган бўлиб, унинг:

• 19,9 трлн сўми (54,9%) жисмоний шахсларга,
• 16,4 трлн сўми тадбиркорларга ажратилган.

5. Агробанк — 16,5 трлн сўм

Агробанк 2025 йилда кредит портфели бўйича энг тез ўсаётган банклардан бири бўлди. Банкнинг жами кредит портфели 64,9 трлн сўмга етиб, уни мамлакатда иккинчи энг йирик банкга айлантирди.

Аҳолига берилган кредитлар ҳажми бир йил ичида 7,2 трлн сўмга ошиб, 16,5 трлн сўмни ташкил этди.

6. Бизнесни ривожлантириш банки — 13,66 трлн сўм

Банкнинг жами кредит портфели 24,55 трлн сўмни ташкил этади. Шундан:

• 13,66 трлн сўми аҳолига,
• 10,9 трлн сўми юридик шахсларга берилган.

Бир йил давомида аҳолига ажратилган кредитлар ҳажми 2 трлн сўмга ошган.

7. Асака банк — 12,86 трлн сўм

Асака банк жами кредит портфели бўйича банк тизимида 4-ўринда туради — 41,5 трлн сўм. Бироқ банк кредитларининг асосий қисми тадбиркорларга тўғри келади.

Аҳолига берилган кредитлар ҳажми 12 трлн 861 млрд сўмни ташкил этади.

8. Ўзсаноатқурилишбанк — 9,7 трлн сўм

Ўзсаноатқурилишбанк 2025 йилда кредит портфели бўйича иккинчи йирик банк эди. Бироқ жорий йилда Агробанк ундан ўзиб кетди.

Ҳозирда банкнинг жами кредит портфели 64,9 трлн сўмни, аҳолига ажратилган кредитлар эса 9,7 трлн сўмни ташкил этади.

9. TBC Bank — 9,17 трлн сўм

TBC Bank Ўзбекистонда микроқарзлар бўйича етакчи банклар қаторига киради. Банкнинг жами кредит портфели 10,3 трлн сўм бўлса, шундан 9,17 трлн сўми аҳолига ажратилган.

10. Ҳамкорбанк — 8,6 трлн сўм

Hamkorbank хусусий банклар орасида энг йирик кредит портфелига эга банклардан бири ҳисобланади. Банкнинг жами кредит портфели 23,96 трлн сўмни ташкил этиб, аҳолига берилган кредитлар ҳажми 8 трлн 621 млрд сўмга тенг.