Ўзбекистонда олтин нархи кетма-кет олтинчи кун рекорд ўрнатди
27 январь куни бир грамм олтин 2 млн 37 минг сўмга етди, бу бир кун аввалги кўрсаткичдан 1,5 фоизга юқори. Жорий йил бошидан буён олтин нархи 17,6 фоизга, ўтган йил шу вақтига нисбатан эса 71 фоизга ўсди. Шунингдек, жаҳон бозорида олтин нархи тарихда илк маротаба 5 100 долларга етди.
Ўзбекистонда олтин нархлари кетма-кет олтинчи кун ҳам рекорд даражага кўтарилди.
Сешанба, 27 январь куни бир грамм олтин нархи 2 037 320 сўмни ташкил этди. Бу кўрсаткич аввалги кунга нисбатан 1,5 фоизга юқори.
Шу билан бирга, 5 граммли олтин қуймаси нархи 10,187 миллион сўмга етди. Бир кун ичида унинг қиймати 151 минг сўмга ошган.
Эслатиб ўтамиз, бир кун аввал Ўзбекистонда олтин нархи илк бор бир грамм учун 2 миллион сўм, энг кичик қуйманинг нархи эса 10 миллион сўм чегарасидан ошганди.
Сўнгги икки ҳафта ичида олтин нархи қарийб 1 миллион сўмга кўтарилди. Жорий йил бошидан буён ўсиш суръати 17,6 фоизни ташкил этган. Ўтган йилнинг шу даврига нисбатан эса олтин нархи 71 фоизга қимматлашган.
Жаҳон бозорида ҳам рекордлар давом этмоқда
Жаҳон бозорида олтин нархи тарихда илк бор бир унция учун 5 100 долларга етди. Бир кун аввал қимматбаҳо металл 5 000 долларлик психологик чегарани босиб ўтган эди.
Хабар тайёрланаётган пайтда олтиннинг бир унсияси 5 063,5 доллардан савдо қилинмоқда. Савдо сессиялари давомида максимал нарх 5 110 долларгача етган.
