Ўзбекистон йил бошидан буён 24 тонна олтин харид қилди

Жаҳон олтин кенгаши маълумотларига кўра, Ўзбекистон Марказий банки апрель ойида 1 тонна олтин сотган. Шунга қарамай, йил бошидан буён амалга оширилган харид ва сотувлар фарқи ҳисобга олинганда, мамлакатнинг соф хариди 24 тоннани ташкил этган.

Натижада Ўзбекистон 2026 йилнинг дастлабки тўрт ойида олтин харид қилган марказий банклар рейтингида иккинчи ўринни эгаллади. Биринчи ўринда Польша бўлиб, ушбу мамлакат йил бошидан буён захираларига 45 тонна олтин қўшган.

Жаҳон олтин кенгаши ҳисоб-китобига кўра, Ўзбекистоннинг олтин захиралари қарийб 414 тоннага етган. Олтиннинг мамлакат жами халқаро захираларидаги улуши эса 88 фоизни ташкил этмоқда.

Апрелда дунё марказий банклари жами соф ҳисобда 19 тонна олтин сотиб олди. Бу март ойида кузатилган йирик соф сотувлардан кейинги тикланиш бўлди. Ой давомида энг кўп олтинни Польша харид қилди — мамлакат захираларини яна 14 тоннага оширди. Польшанинг жами олтин захиралари 595 тоннага етиб, умумий захираларининг қарийб 30 фоизини ташкил қилмоқда.

Хитой Халқ банки апрель ойида 8 тонна олтин сотиб олди. Бу 2024 йил декабридан буён қайд этилган энг катта ойлик харид бўлди. Хитой кетма-кет 18 ойдан бери олтин захираларини кўпайтириб келмоқда. Мамлакатнинг расмий олтин захиралари 2,3 минг тоннадан ошган.

Чехия Марказий банки эса апрель ойида яна 3 тонна олтин харид қилди. Бу банкнинг кетма-кет 38-ойлик хариди бўлиб, мамлакат олтин захиралари 79 тоннага етган.

Айрим давлатлар, аксинча, олтин сотишни давом эттирди. Россия апрель ойида 6 тонна, йил бошидан буён эса жами 22 тонна олтинни соф ҳисобда сотган. Туркиянинг олтин захиралари эса апрель ойида деярли ўзгаришсиз қолган.

Жаҳон олтин кенгаши қайд этишича, сўнгги йилларда марказий банкларнинг олтин харидлари асосан Шарқий Европа ва Осиё давлатлари ҳиссасига тўғри келмоқда. Охирги 36 ойда дунё марказий банклари ойига ўртача 29 тоннадан олтин сотиб олган.