Ўзбекистон хусусийлаштириш стратегиясида асосий эътибор SQB’га қаратилмоқда
Fitch’нинг базавий сценарийсига кўра, SQB’даги назорат пакети сотуви UzNIF’нинг 2026 йилда режалаштирилган IPO’сидан кейин амалга ошиши мумкин. Жорий йил сентябрь ойида СҚБ’нинг 30 фоизлик улуши жамғарма таркибига ўтказилган эди.
Fitch Ratings халқаро рейтинг агентлиги Ўзбекистоннинг хусусийлаштириш стратегиясида эндиликда эътибор кўпроқ Саноатқурилишбанк (SQB) га қаратилаётганини маълум қилди.
Ўзбекистон Миллий инвестиция жамғармаси (UzNIF) SQB’ни ислоҳ қилиш жараёнида марказий роль ўйнамоқда. Ҳукумат бу банкни хусусийлаштиришнинг асосий йўналишларидан бири сифатида белгилаган.
Сентябрь ойида қабул қилинган Президент фармонига кўра, SQB’нинг Иқтисодиёт ва молия вазирлигига тегишли 30 фоизлик улуши Миллий инвестиция жамғармасига ўтказилди.
Аввалроқ банкдаги давлат улушини 2025 йил якунига қадар 50 фоиздан камайтириш мажбурияти белгиланган эди, бироқ ушбу талаб эндиликда бекор қилинди.
Ҳукуматнинг 2025 йил июль ойида тасдиқланган фискал стратегиясига мувофиқ, СҚБ, Асакабанк (BB/Барқарор), Алоқабанк (BB/Барқарор) ва Туронбанкни 2026 йилда ёки ундан кейинги даврда хусусийлаштириш режалаштирилган.
Fitch’нинг базавий сценарийсига кўра, СҚБдаги назорат пакети сотуви UzNIF’нинг 2026 йилда режалаштирилган IPO’сидан сўнг амалга ошиши мумкин. Бу эса банк хусусийлаштириш жараёнини янада жадаллаштиради.
“СҚБнинг муваффақиятли хусусийлаштирилиши Асакабанк ва Алоқабанк каби бошқа давлат банклари учун ҳам ижобий намуна бўлиши мумкин. Бироқ уларнинг хусусийлаштирилиш истиқболлари, эҳтимол, 2030 йилгача чўзилади”, — дейилади агентлик шарҳида.
Ўзбекистон ва IPO
Эслатиб ўтамиз, 1 майдан бошлаб Ўзбекистон Миллий инвестиция жамғармаси бошқаруви АҚШнинг Franklin Templeton инвестиция гуруҳига ўтказилган эди.
Ҳозирги кунда UzNIF тахминан 1,7 миллиард долларлик активларни бошқармоқда. Жамғарма Лондон ва Тошкент фонд биржаларида қўшма IPO (бошланғич оммавий таклиф) ўтказиш имкониятини ҳам кўриб чиқмоқда.
Franklin Templeton компанияси жорий йилда жамғарма бошқарувини ўз зиммасига олган ва ҳозирда STJ Advisors каби халқаро молиявий маслаҳатчилар билан ҳамкорликда ишламоқда.
Компания вакилларининг таъкидлашича, UzNIF акциялари Тошкент фонд биржасида ва хорижий биржалардан бирида жойлаштирилади. Ҳозирча қайси халқаро биржа танланиши аниқ эмас.
Аввалроқ Pinkod НКМК Ўзбекистон ва Буюк Британияда иккита IPO ўтказишга тайёргарлик кўраётгани ҳақида ёзган эди.
Давлат корхонаси қарзларни ҳам ҳисобга олган ҳолда тахминан 20 миллиард долларлик баҳолашга эришишни кутмоқда.
